ფინანსური კოეფიციენტი, რომელიც მიანიშნებს, აქტივების რამხელა ნაწილია დაფინანსებული გრძელვადიანი ვალდებულებებით. გამოითვლება შემდეგი ფორმულით:
გრძელვადიანი ვალის აქტივებთან თანაფარდობის კოეფიციენტი=გრძელვადიანი ვალდებულებები/მთლიანი აქტივები
კოეფიციენტი გამოიყენება იმის შესაფასებლად, რამდენად აქვს ორგანიზაციას შესაძლებლობა, დაფაროს ფინანსური ვალდებულებები - რამდენად გადახდისუნარიანია იგი გრძელვადიან პერიოდში. კოეფიციენტის მაღალი მაჩვენებელი მიუთითებს მაღალ რისკზე, რომ კომპანიას შეიძლება ვალის გასტუმრებასთან დაკავშირებული პრობლემები შეექმნას, დაბალი მაჩვენებელი კი - კომპანიის ფინანსურ სიჯანსაღეზე. მაგალითად, თუ კომპანიის გრძელვადიანი ვალის აქტივებთან თანაფარდობის კოეფიციენტი 2-ის ტოლია, ამ კომპანიის გაკოტრების რისკი საკმაოდ მაღალია და ეს ინვესტორებისთვის იძლევა სიგნალს, რომ სკეპტიკურად შეხედონ ამ კომპანიას და თავი შეიკავონ მის ვალდებულებებში ინვესტირებისაგან (მაგალითად, ამ კომპანიის მიერ გამოშვებული ობლიგაციების შეძენისგან).
to main page 
top of page