მეტაგენეზი

სქესობრივი და უსქესო თაობების მორიგეობის ფორმა. კარგად აქვთ გამოხატული პიდროიდულ და სციფოიდურ ნაწლავღრუიანებს. მათი სქესობრივი თაობა იწოდება მედუზად, ხოლო უსქესო – პოლიპად. ასე, მაგ. პოლიპი ობელია წარმოადგენს ხის მაგვარ კოლონიას, რომელიც შედგება მრავალი ასეული და ათასეული ინდივიდისაგან – ჰიდრანტებისაგან. ისინი დაკვირტვით (უსქესოდ) მრავლდებიან: კოლონიის რომელიმე ადგილას წარმოიქმნება გონანგიუმი, მათში ბლასტოსტილზე დაკვირტვით კი – მედუზები. ეს უკანასკნელნი მრავლდებიან სქესობრივად. განაყოფიერებული კვერცხუჯრედიდან წარმოიქმნება ლარვა – პლანულა, რომელიც ეშვება ფსკერზე გადაიქცევა ერთეულ პოლიპად და იწყებს დაკვირტვას. სციფოიდებში უფრო განვითარებულია სქესობრივი, მედუზოიდური თაობა. ზოგჯერ ხდება მედუზოიდური თაობის რედუქცია: მედუზური კვირტებისაგან წარმოიქმნებიან სქესობრივი ინდივიდები, რომლებიც არ წყდებიან კოლონიას (მედუზოიდები, გონოფორები, სპოროსაკები). მეტაგენეზი ახასიათებს აგრეთვე სალპებს, ასციდიებს.