ლეონტი ოთარის ძე მამალაძე

   ლეონტი მამალაძე დაიბადა 1867 წლის 9 აპრილს გურიის სოფელ ხევში.  ანბანი 19 წლისამ შეისწავლა და თვითგანვითარებით გაიკვლია გზა.

    1886 წლიდან ვანო დოლმაზაშვილის, გიგაურისა და იოსებ დავითაშვილის წრეში მონაწილეობდა, სადაც, უმთავრესად, ქართული წიგნების კითხვით ცდილობდნენ თვითგანვითარებას. 1888 წლიდან მუშათა ჯგუფებში ჩაერთო და აქტიური მონაწილე გახდა. სოციალ-დემოკრატიული წრეების ჩამოყალიბების დროს, ნაძალადევის რაიონში მუშაობდა, 1895-1896 წლებში არსენალში ჰყავდა ჯგუფი, რომლის წევრთაც სოციალისტური შინაარსის წიგნებს აკითხებდა.

   1897 წელს, სოციალ-დემოკრატიული ორგანიზაციის დავალებით, ადელხანოვის ფეხსაცმლის ქარხანაში დაიწყო მუშაობა და წრეები შექმნა. 1900 წელს მამალაძის ბინაძე გადაწყდა კონკის მუშათა გაფიცვა, რომელთა მოთხოვნები დირექციას თავად მამალაძემ გადასცა.

   1901 წელს პირველმაისობის ერთ-ერთი აქტიური მესვეურთაგანი იყო. შეხლა-შემოხლის დროს ჟანდარმებსა და პოლიციას იარაღით წინააღმდეგობა გაუწია და ერთი პოლიციელი დაჭრა, რის გამოც უმოწყალოდ სცემეს და ცოცხალ-მკვდარი დროგით საავადმყოფოში წაიღეს, სამი თვის შემდეგ სეკრეტში ჩასვეს, მერე – ორლოვის საკატორღო ციხეში, აქედან ორლოვის გუბერნიის ქალაქ ელეცში 5 წლით გადაასახლეს.

   1905 წელს ციმბირიდან გამოიქცა, არალეგალურად ცხოვრობდა და რევოლუციურ მუშაობას აწარმოებდა გორში, ცხინვალსა და ხაშურში. ამავე წელს ბათუმში გააგზავნეს ბარცხანიდან არალეგალური სტამბის გადმოსატანად თბილისის კომიტეტის განკარგულებაში.

    1906 წელს შეიპყრეს და სამხედრო სამართალში მისცეს. მოელოდა დახვრეტა. სათათბიროს წევრთა დახმარებით, პალატაში გაასამართლეს, მიუსაჯეს 4 წლის კატორღა, რაც ციხედ შეეცვალა, ხოლო მთავრობის განკარგულებით მთელი ქონება ჩამოერთვა. 4 წლის შემდეგ, ციხიდან პოლიციის ზედამხედველობის ქვეშ გამოუშვეს. პოლიციას მიემალა და დუშეთის მაზრაში რევოლუციურ მუშაობას აწარმოებდა.

    1915 წელს, მთავრობის მოთხოვნით, როგორც ხელოსანი, არსენალში დაბრუნდა. 1500 მუშას შორის ომის საწინააღმდეგო პროკლამაციას ავრცელებდა ქართულ, სომხურ და რუსულ ენებზე, რომლებიც არსენალის ახლოს, სომეხთა სემინარიაში მოწყობილ არალეგალურ სტამბაში იბეჭდებოდა.

    1917 წლიდან ლეონტი მამალაძე გახლდათ "ქართველთა შორის წერა-კითხვის გამავრცელებელი საზოგადოების" თბილისის განყოფილების წევრი.

   ლეონტი მამალაძის შემდგონი ბედი უცნობია.

• ქართველთა შორის წერა-კითხვის გამავრცელებელი საზოგადოება, საზოგადოების თბილისის განყოფილების წევრი (1917-)

• "ქართველ მოღვაწეთა ლექსიკონი" : იოსებ იმედაშვილი. - თბილისი, ეროვნული ბიბლიოთეკის გამომცემლობა