ივანე (ვანო) გიორგის ძე საათაშვილი

   ივანე საათაშვილი დაიბადა 1887 წლის 4 ოქტომბერს დუშეთში გლეხის ოჯახში.

    ივანე საათაშვილი დუშეთის მაზრის გლეხებში რევოლუციურ მუშაობას აწარმოებდა. ექვსი წლის განმავლობაში, სოფლად სამსახურის დროს, ხალხში თვითცნობიერება პროპაგანდით, მწერლობითა და წარმოდგენების მართვით შეჰქონდა.

    საათაშვილი ეწეოდა მთარგმნელობით საქმიანობას. თარგმნილი აქვს ბრიესის სამმოქმედებიანი პიესა „დასჯილნი“, რომელიც 1913 წელს დაიბეჭდა კიდეც.

   ვანო საათაშვილი არალეგალური წიგნების გავრცელებისათვის მეფის რეჟიმის დროს რამდენჯერმე იყო დაპატიმრებული.

   საათაშვილი გახლდათ რწმენით „ალიონელი“, ეროვნული სოციალ-დემოკრატი, სამშობლო ქვეყნის დასაწინაურებლად საჭიროდთვლიდა სოფლიდან გამოსული და ქალაქში ნასწავლი ადამიანების სოფელში სამოღვაწეოდ დაბრუნებას, ხალხის გონებრივ-ზნეობრივ და სხეულებრივად გაღონიერებას.

   1915 წლიდან ივანე საათაშვილი გახლდათ „ქართველთა შორის წერა-კითხვის გამავრცელებელი საზოგადოების ნამდვილი წევრი და აქტიურად იყო ჩაბმული საზოგადოების საქმიანობაში.

   ივანე საათაშვილი გარდაიცვალა 1920 წელს.

• ქართველთა შორის წერა-კითხვის გამავრცელებელი საზოგადოება, საზოგადოების ნამდვილი წევრი (1915-)
• ქართველთა შორის წერა-კითხვის გამავრცელებელი საზოგადოება, საზოგადოების თბილისის განყოფილების წევრი (1917-)

• "ქართველ მოღვაწეთა ლექსიკონი" : იოსებ იმედაშვილი. - თბილისი, ეროვნული ბიბლიოთეკის გამომცემლობა