ევგენია სტანისლავის ასული სოღორაშვილი

   ევგენია სოღორაშვილი დაიბადა 1860 წლის 13 იანვარს ქუთაისში.

   ევგენიამ დაამთავრა ქუთაისის გიმნაზია და 1887 წლიდან მასწავლებლობდა ხონში, ოზურგეთსა და ბათუმში.

   1899 წლიდან ევგენია გახლდათ "ქართველთა შორის წერა-კითხვის გამავრცელებელი საზოგადოების" ნამდვილი წევრი და აქტიურად იყო ჩაბმული საზოგადოების საქმიანობაში.

   ბათუმში მუშაობის პერიოდში ახლო კავშირი ჰქონდა ბათუმის პირველ მარქსისტულ წრესთან და მუშათა შორის აგიტაცია-პროპაგანდას ეწეოდა. სრულიად უფასოდ ასწავლიდა ბათუმის ქარხნის მუშათა საკვირაო სკოლაში, რომელიც მოგვიანებით ჟანდარმერიამ დაკეტა. სამაგიეროდ, როცა ბათუმის ინტელიგენტთა ჯგუფმა, „ქართველთა შორის წერა-კითხვის გამავრცელებელმა საზოგადოების“ სკოლასთან მეორე საკვირაო სკოლა გახსნა,  სოღორაშვილი აქაც ბეჯითად მეცადინეობდა მუშებთან, რის გამოც 1903 წელს ჟანდარმერიამ იგი ჯერ მასწავლებლობიდან დაათხოვნინა ბრალდებით - „მუშებს აჯანყებისათვის ამზადებსო“ და ბოლოს შეპყრობა დაუპირა, მაგრამ სოღორაშვილმა თავს საზღვარგარეთ გადახვეწით უშველა.

   ევგენია სოღორაშვილი რუსეთისა და საფრანგეთის სოციალ-დემოკრატიულ პარტიაში მუშაობდა. მას მჭიდრო ურთიერთობა ჰქონდა საფრანგეთის სოციალისტებთან, დიდი გავლენითაც სარგებლობდა და ამ გავლენის მეოხებით, ქართველ ემიგრანტებს დიდ დახმარებას უწევდა.

   ევგენია სოღორაშვილი 1938 წელს ემიგრაციაში გარდაიცვალა.