ილია ზურაბის ძე გოპაძე

      ცნობილი ფტიზიატრი ილია გოპაძე დაიბადა 1853 წელს ქალაქ ქუთაისში. 1878 წელს დაამთავრა პეტერბურგის მედიკურ-ქირურგიული აკადემია.  გახლდათ პროფ. კაშლაკოვისა და პასტერნაცკის მოწაფე. სამკურნალო მასაჟის დარგში პროფ. ბერლინგთან დახელოვნდა შვეიცარიაში.

    1886 წელს დაიცვა სადოქტორო დისერტაცია თემაზე: „О влиянии общего массажа на азотистый обмен и на всасывание азотосодержащих продуктов“. 1888 წელს მასაჟისა და სამკურნალო ტანვარჯიშის დარგში კვალიფიკაცია აიმაღლა ბერლინში. 

      1888-1894 წლებში პეტერბურგის ჰოსპიტალურ თერაპიულ კლინიკაში მუშაობდა, ხოლო 1894-1909 წლებში აბასთუმნის სამხედრო ჰოსპიტლის მთავარი ექიმის თანამდებობა ეკავა. 1898 წლიდან აბასთუმნის მინერალური წყლების დირექტორად დაინიშნა.

     1914–1917 წლებში კავკასიის სამხედრო ოლქის საექიმო-სანიტარული სამმართველოს უფროსად დაინიშნა და სამედიცინო სამსახურის გენერალ–მაიორის წოდებაც მიენიჭა. 1921 წლიდან მთლიანად კურორტ აბასთუმნის კონსულტანტი გახლდათ და აქტიურად მონაწილეობდა კურორტის კეთილმოწყობასა და მშენებლობაში. შეისწავლა მისი კლიმატური და ბალნეოლოგიური ფაქტორების როლი ტუბერკულოზისა და სხვა დაავადებათა მკურნალობაში.

     ილია გოპაძე გახლდათ კავკასიაში ტუბერკულოზის წინააღმდეგ მებრძოლი საზოგადოების გამგეობის და ქართველ ექიმთა და ბუნებისმეტყველთა საზოგადოების წევრი, საქართველოს სსრ ჯანსახკომის ტუბერკულოზის საბჭოს წევრი და საქართველოს საისტორიო–საეთნოგრაფიო საზოგადოების სამეცნიეროსატერმინოლოგიო საექიმო წრის თავმჯდომარე.

• კავკასიაში ტუბერკულოზის წინააღმდეგ მებრძოლი საზოგადოების გამგეობა, გამგეობის წევრი
• საქართველოს ისტორიულ-ეთნოგრაფიული საზოგადოების სამეცნიერო სატერმინოლოგო საექიმო წრე, პირველი თავმჯდომარე
• ქართველ ექიმთა და ბუნებისმეტყველთა საზოგადოება, საზოგადოების წევრი
• ქართველთა შორის წერა-კითხვის გამავრცელებელი საზოგადოება, საზოგადოების ნამდვილი წევრი (1911-1915)

• წმინდა ანდრიას ორდენი
• წმინდა ანას ორდენი
• წმინდა სტანისლავის ორდენი

• ქართული საბჭოთა ენციკლოპედია : ტომი 3. - თბილისი, საქართველოს სსრ მინისტრთა საბჭოს გამომცემლობა, 1978. - 670გვ.