ილია მანუჩარის ძე ჩიქოვანი (პონტელი)

    ილია ჩიქოვანი დაიბადა 1870 წლის 18 ოქტომბერს (ძვ. სტ.) ქალაქ ქუთაისში. სწავლობდა ქუთაისის კლასიკურ გიმნაზიაში. 1891 წელს სწავლა განაგრძო ოდესის უნივერსიტეტის იურიდიულ ფაკულტეტზე, რომლის დამთავრების შემდეგ ერთი წელიწადი საზღვარგარეთ სწავლობდა.

    1892-1895 წლებში ილია ჩიქოვანი ილია ჭავჭავაძის გაზეთ „ივერიაში“ თანამშრომლობდა. აქვეყნებდა კრიტიკულ წერილებს, ლექსებსა და დრამატულ სცენებს „კვალში“, „ცნობის ფურცელში“, „მოამბეში“ და სხვა ჟურნალ-გაზეთებში. ილია ჩიქოვანი ქუთაისში, საფინანსო დარგში ხარჯთამკრებთა ინსპექტორად მსახურობდა.

    1902 წელს იგი ქალაქ ქუთაისის საქალაქო საბჭოს ხმოსნად იქნა არჩეული, ხოლო 1911 წელს ქუთაისის თავად იქნა დასახელებული.

    1912 და 1915 წლებში ჩიქოვანი ქუთაისის მოურავის მოვალეობას ასრულებდა. ამ თანამდებობაზე მუშაობის პერიოდში მან თეატრის აშენება განიზრახა, რისთვისაც ეკატერინე სარაჯიშვილს გადაადებინა კიდეც თეატრის ასაშენებელი თანხა 150.000 მანეთი, ხოლო ქუთაისის დრამატული საზოგადოების ნივთიერი სახსრების გასაძლიერებლად 25.000 მანეთი.

    1917 წლის რევოლუციის შემდეგ არჩეული იყო ქუთაისის გუბერნიის კომისრად, ხოლო 1918 წელს ქუთაისის სახაზინო პალატის მმართველად დაინიშნა. 1921-1922 წლებში, საბჭოთა წყობილების დამყარების შემდეგ, ილია ჩიქოვანი ქუთაისში ხელოვნების მუშაკთა გამგეობის წევრად იქნა არჩეული და 1923 წლიდან თბილისში, განათლების სახალხო კომისარიატში მსახურობდა.

    1924-1940 წლებში ილია ჩიქოვანი საქართველოს სსრ ფინანსთა სახალხო კომისარიატში სხვადასხვა თანამდებობებზე მუშაობდა.