17 თებერვლიდან ევროპის ბიბლიოთეკას ახალი ვებ გვერდი აქვს. www.TheEuropeanLibrary.org–ზე შესულს საშუალება ეძლევა, ისარგებლოს ყველა სფეროს სასწავლო და საკვლევი მასალებით ევროპის 38 ეროვნული ბიბლიოთეკიდან. ამჟამად ევროპელი მომხმარებლისთვის ვებ გვერდზე მუშაობა შესაძლებელია თავის მშობლიურ ენაზე, მათ შორის, ქართულადაც.
ახალი პორტალის შექმნისას გათვალისწინებული იყო კვლევის შედეგები, საიდანაც გამოჩნდა, რომ მომხმარებლისთვის ყველაზე მნიშვნელოვანი საიტზე მშობლიურ ენაზე მუშაობის საშუალება არის. შედეგად დღეს პორტალზე ნავიგაცია და დამხმარე მასალების ("ხშირად დასმული კითხვები", "მომხმარებლის გზამკლევი") გაცნობა 22 ევროპულ ენაზეა შესაძლებელი.
როგორც კვლევებიდან გამოჩნდა, მომხმარებლისთვის საინტერესოა საიტის დამატებითი შემოთავაზებებიც. მაგალითად, ელექტრონული გამოფენები, სადაც წარმოდგენილია ექსპონატები ეროვნული ბიბლიოთეკების კოლექციებიდან. ერთ–ერთი უკანასკნელი ასეთი გამოფენა მიეძღვნა ნაპოლეონის წარმოებულ ომებს. ესპანეთის, პორტუგალიის, საფრანგეთის, დიდი ბრიტანეთის, შვეიცარიის, დანიის, ნიდერლანდებისა და სერბეთის ეროვნული ბიბლიოთეკებიდან გამოიფინა ორასზე მეტი რარიტეტული ექსპონატი.
