მარში

მუსიკალური ნაწარმოები მწყობრი ნაბიჯის ტემპით, ენერგიული, მტკიცე, ორწილადი ზომის. როგორც წესი, სამნაწილიანი ფორმისაა, სადაც შუა ნაწილი კონტრასტული, ლირიკულია, ხოლო მესამე - იმეორებს პირველს. მარშს გააჩნია დიდი მაორგანიზებელი ძალა, ამიტომ ხშირად იყენებენ საბრძოლო სულის ასამაღლებლად საომარი მოქმედებების დროს - ასეთ სამხედრო მარშებს ასრულებს, როგორც წესი, სასულე ორკესტრი. არსებობს სადღესასწაულო, სამგლოვიარო, სპორტული, მხედრული და სხვა სახის. მარშის ჟანრი ფართოდ გამოიყენება თეატრალურ, სიმფონიურ, სოლო-საკრავიერ მუსიკაში (მაგ., ვერდის ოპერაში „აიდა“, ჩაიკოვსკის ბალეტში „მაკნატუნა“, ბეთჰოვენის, მენდელსონის, შოპენის ნაწარმოებებში).