ავსტრია-პრუსიის ომი 1866
NPLG Wiki Dictionaries გვერდიდან
ავსტრია-პრუსიის ომი 1866, ბრძოლა პრუსიასა და ავსტრიას შორის გერმანიაში პირველობისათვის.
ავსტრიას სამხედრო მოქმედებების წარმოება მოუხდა ორი მიმართულებით – იტალიის (ავსტრია-იტალიის ომი 1866) და ჩეხიის ფრონტებზე. ვინაიდან ავსტრიამ იტალიის წინააღმდეგ მნიშვნელოვანი ძალები გამოყო (დაახლოებით 140 000 კაცი), ჩეხიის ფრონტზე პრუსიელებს გარკვეული უპირატესობა ჰქონდათ (272 000 კაცი 261 000-ის წინაარმდეგ).
გადამწყვეტი ბრძოლა მოხდა ჩეხეთში, სადოვასთან, რომელშიც ავსტრიელები სასტიკად დამარცხდნენ (44 000 მოკლული, დაჭრილი და ტყვედ ჩავარდნილი).
პრაღის საზავო ხელშეკრულებით (1866) ავსტრიამ თანხმობა განაცხადა გერმანიის ახლებურ მოწყობაზე პრუსიის ჰეგემონობით. ავსტრია-პრუსიის ომი მნიშვნელოვანი ეტაპი იყო პრუსიის მიერ გერმანიის „ზემოდან“ გაერთიანების გზაზე.
