გაბბა მელკიადე

გაბბა მელკიადე (20.VIII.1874, მილანი - 17.XI.1952, რომი) - იტალიელი პოლიტიკოსი და სამხედრო პირი. იტალიის არმიის ოფიცერი. იტალიის სამეფოს მისიის ხელმძღვანელი ამიერკავკასიაში. აფრიკის კოლონიათა მინისტრი.

ბიოგრაფია

დაიბადა არისტოკრატიულ ოჯახში. განათლება მილანის სამხედრო აკადემიაში და ომის სამხედრო სკოლაში მიიღო. 1911-1915 წლევში იყო ერიტრეაში იტალიის საოკუპაციო ძალების ერთ-ერთი მეთაური. პირველი მსოფლიო ომის მიმდინარეობისას დაბრუნდა იტალიაში და ხელმძღვანელობდა საარტილერიო შენაერთებს.

1919 იტალიის პრემიერ-მინისტრ ორლანდოსა და ბრიტანეთის პრემიერ-მინისტრ ლოიდ ჯორჯს შორის შემდგარი მოლაპარაკებების შემდეგ, იტალიამ სურვილი გამოთქვა ამიერკავკასიაზე მანდატის აღების შესახებ. იტალიის სამხედრო ძალების მეთაურმა გენერალმა დიასმა, პოლკოვნიკ გაბბას მეთაურობით, ამიერკავკასიაში 18-კაციანი მისია მოავლინა, რომელსაც საფუძვლიანად უნდა შეესწავლა ამიერკავკასიის ეკონომიკური და პოლიტიკური მდგომარეობა. 1919 წლის აპრილში გაბბა კონსტანტინოპოლისა და ბათუმის გავლით თბილისში გამოემგზავრა. გაბბა საქართველოში შეხვდა ოფიციალურ პირებს, შეისწავლა მდგომარეობა და ივნისის თვეში, პარიზში დაბრუნებულმა, ანგარიში წარუდგინა ხელმძღვანელებს. გაბბა, მიუხედავად მძიმე მდგომარეობისა, ემხრობოდა ამიერკავკასიაზე იტალიური მანდატის აღებას. მისი გათვლით, ამიერკავკასიის კონტროლისათვის და ჩრდილოეთიდან დაცვისათვის 40 000 ჯარისკაცი საკმარისი იქნებოდა. იტალიის მხრიდან ამიერკავკასიაზე შესაძლო მანდატის აღებას, იმ პირობებში, როცა ბრიტანეთს გადაწყვეტილი ჰქონდა ევაკუაცია კავკასიიდან, საქართველოს მთავრობა დადებითად აფასებდა. თუმცა იტალიის ხელისუფლებაში ლიბერალი ორლანდოს კაბინეტის რადიკალი ნიტის მთავრობით შეცვლამ იტალიური იმპერიული პოლიტიკა მკვეთრად შეცვალა. იტალია, მართალია, საბოლოოდ უარს არ ამბობდა მანდატზე, მაგრამ ინტერესები მხოლოდ ეკონომიკურ საკითხებზე გადაჰქონდა. გაბბა ცდილობდა, თავისი სამხედრო მისია საგარეო საქმეთა სამინისტროში გადასულიყო და ეკონომიკურ საკითხებზე ემუშავა კავკასიასთან მიმართებაში. საბოლოოდ, 1920 იტალიური სავაჭრო მისია ესტუმრა საქართველოს და შეთანხმებაც შედგა ტყვარჩელის ქვანახშირის ერთობლივი დამუშავების შესახებ.

1921 წელს პოლკოვნიკი გაბბა ერიტრეაში კოლონიური ძალების მეთაურად დაბრუნდა. 1926 წელს ბრიგადის გენერალის ჩინი მიიღო. 1934-1936 წლეში კვლავ დაწინაურდა და არმიის გენერლის ჩინი მიენიჭა. იყო იტალიის პარლამენტის სენატორი, 1943-1944 წლებში - აფრიკის საკითხთა მინისტრი.

ირაკლი ირემაძე

ლიტერატურა

• ბ. კობახიძე, „საქართველოს საკითხი პარიზის საზავო კონფერენციაზე“, ისტორიის დოქტორის აკადემიური ხარისხის მოსაპოვებლად წარმოდგენილი დისერტაცია, თსუ, 2015;
• გაზ. „საქართველოს რესპუბლიკა“, 1920. №25.

წყარო

საქართველოს დემოკრატიული რესპუბლიკა (1918-1921) ენციკლოპედია-ლექსიკონი