გელოვანი არჩილ
გელოვანი არჩილ ვიქტორის ძე - (1915–1978), საბჭოთა მხედართმთავარი, საინჟინრო ჯარების მარშალი (1977).
დაამთავრა საქართველოს ინდუსტრიული ინსტიტუტი (1936), 1939 წლიდან ინჟინერ-მშენებელია. სამხედრო სამსახურში იყო 1939 წლიდან. II მსოფლიო ომის დროს ხელმძღვანელობდა სამხედრო-საზღვაო და საფორტიფიკაციო მშენებლობებს. ომის შემდეგ ეკავა საპასუხისმგებლო თანამდებობები შავი ზღვის ფლოტის საინჟინრო სამმართველოში. შემდეგ იყო სამხედრო-საზღვაო სამშენებლო სამმართველოს უფროსის მოადგილე. 1959 წლიდან - სამმართველოს უფროსი, შემდეგ - ფლოტის სარდლის თანაშემწე მშენებლობის დარგში. 1962 წლიდან ხელმძღვანელობდა სსრ კავშირის თავდაცვის სამინისტროს სხვადასხვა სამხედრო-სამშენებლო სამმართველოებს, 1974–78 წლებში თავდაცვის მინისტრის მოადგილე მშენებლობისა და ჯარების დაბინავების დარგში.
