გერმანია-პოლონეთის ომი 1939
გერმანია-პოლონეთის ომი 1939 - ნაცისტური გერმანიის აგრესია პოლონეთის წინააღმდეგ, მისი, როგორც დამოუკიდებლი სახელმწიფოს, ლიკვიდაციისა და ტერიტორიის ანექსიის მიზნით.
1939 წლის 1 სექტემბერს პოლონეთში შეიჭრა ვერმახტის 54 დივიზია (1,5 მლნ კაცი, 3,6 ათ. ტანკი, 6 ათ. ქვემეხი და ნაღმსატყორცნი, 1,9 ათ. თვითმფრინავი). პოლონეთის შეიარაღებული ძალები (დაახლოებით 1 მლნ. კაცი, 870 ტანკი და ტანკეტი, 4,3 ათ. ქვემეხი და ნაღმსატყორცნი, 824 თვითმფრინავი) მედგარი წინააღმდეგობის მიუხედავად ერთ თვეში დამარცხდნენ.
პოლონეთის მოკავშირეებმა, დიდმა ბრიტანეთმა და საფრანგეთმა, გერმანიას ომი გამოუცხადეს, მაგრამ პრაქტიკული დახმარება პოლონეთისათვის არ გაუწევიათ. სამაგიეროდ, ამ კამპანიაში გერმანიას აღმოაჩნდა ფაქტობრივი მოკავშირე საბჭოთა კავშირის სახით, რომლის ჯარები 1939 წელს გერმანია-სსრ კავშირის ხელშეკრულების (გერმანიის სსრ კავშირის თავდაუსხმელობის პაქტი) საიდუმლო დამატებითი პროტოკოლის თანახმად, 17 სექტემბერს შეიჭრნენ პოლონეთში და ხელთ იგდეს მისი აღმოსავლეთი ნაწილი.
პოლონეთის არმიამ გერმანიასთან ბრძოლაში დაკარგა მოკლულთა სახით 66,3 ათ. კაცი, 133,7 ათ. დაიჭრა, დაახლ. 420 ათ. ტყვედ ჩავარდა.
გერმანელთა ზარალი: 10,6 ათ. მოკლული, 30,3 ათ. დაჭრილი, 3,4 ათ. უგზოუკვლოდ დაკარგული.
გერმანია-პოლონეთის ომმა ცხადყო შეტევითი ოპერაციების დროს ჯავშანსატანკო და სამხედრო-საჰაერო ძალების გაზრდილი მნიშვნელობა.
