ეგისი
ეგისი – (ბერძნ.) „თხის ტყავი“. ფარი, რომელიც ითვლებოდა ზევსის, ათენასა და ზოგჯერ აპოლონის ატრიბუტად.
ჰომეროსის თანახმად, ეგისი ფარია, რომელიც ჰეფესტომ გამოჭედა ზევსისთვის. მისი ერთ-ერთი ეპითეტი „ეგიოქოსი“ სწორედ ამ ეგისს უკავშირდება.
ჰომეროსის შემდგომდროინდელ თქმულებებში ეგისი თხის, ამალთეას, ტყავია. ეს ის ამალთეაა, იდას მთაზე გადამალული პატარა ზევსი რომ გამოკვება. ტიტანებთან ბრძოლისას ზევსმა ამალთეას ტყავი გადააკრა თავის ფარს და ზედ გორგო-მედუზას თავი მიამაგრა. ზევსს ბრძოლების ჟამს ეს ეგისი არც კი დასჭირვებია. მარჯვენა ხელით იგი ელვას სტყორცნიდა ხოლმე, ხოლო მარცხენათი არხევდა ფარს და საწვიმარ ღრუბლებს მიდენიდა. იგი ხშირად გადასცემდა ხოლმე ამ ეგისს აპოლონს, უფრო ხშირად კი ათენას, რომლებიც მას ატარებდნენ, როგორც ზევსის ძლიერების სიმბოლოს. ძვ.წ. VI საუკუნიდან მედუზას თავიანი ეგისი ათენას მუდმივი ატრიბუტი ხდება.
გადატანითი მნიშვნელობით „ეგისი“ მფარველს ნიშნავს. არსებობს გამოთქმა: „ეგისის ქვეშ ყოფნა“, რაც ვინმეს (ან რამეს) მფარველობას გულისხმობს.
