ედ დაულე ზოკა

NPLG Wiki Dictionaries გვერდიდან
გადასვლა: ნავიგაცია, ძიება
ედ დაულე ზოკა

ედ დაულე ზოკა - სპარსეთის (1935 წლიდან ირანი) დელეგატი ერთა ლიგის ყრილობაზე, რომელმაც 1920 წლის 16 დეკემბრის ერთა ლიგის სხდომაზე სხვებთან ერთად მხარი დაუჭირა საქართველოს დემოკრატიული რესპუბლიკის ერთა ლიგაში მიღებას.

1918-1921 წლებში საქართველოს დამოუკიდებელი რესპუბლიკის საგარეო პოლიტიკაში უმნიშვნელოვანესი იყო ურთიერთობები „ერთა ლიგასთან“. „ერთა ლიგა“, რომლის „შვილობილ“ ორგანიზაციასაც წარმოადგენს „გაერო“, 1919 წელს შეიქმნა. ეს იყო საერთაშორისო ორგანიზაცია, რომელიც პირველი მსოფლიო ომის შემდეგ შეიქმნა და რომლის მიზანიც საერთაშორისო მშვიდობის მისაღწევად ერების კონსოლიდაცია იყო. ზოკა ედ დაულემ საქართველოსადმი თავისი მხარდაჭერა ასე დაასაბუთა: „მე დიდი მადლობა უნდა გამოვუცხადო იმ ჩემს პატივცემულ კოლეგებს, რომლებიც რუსეთის იმპერიისგან ჩამოშორებულ სახელმწიფოთა მხარეზე დადგნენ, მაგრამ წინააღმდეგ პოლონეთის წარმომადგენლისა, მე არ შემიძლია ჩემი ხმა არ მივცე მცირე ერთა მიღების სასარგებლოდ... დღეს დილით ჩვენ დავაკმაყოფილეთ ფინლანდიის შუამდგომლობა. რით აიხსნება სხვაგვარი დამოკიდებულება საქართველოს და ბალტიისპირეთის სახელმწიფოების მიმართ? დილით კრებამ განიხილა სომხეთის მდგომარეობა. მე მინდა აღვნიშნო, რომ სომხეთის მდგომარეობა მკვიდრი არ არის. სინამდვილეში სომხეთის რესპუბლიკა აღარ არსებობს. აი, რატომ იყო სპარსეთი იძულებული, თავი შეეკავებინა სომხეთის კენჭისყრის დროს. ასეთი არაა საქართველოს მდგომარეობა. ის ორგანიზაციულად მოწყობილი ქვეყანაა, მტკიცე მთავრობით, ჯარით, რომელმაც შეძლო ქვეყნის დაცვა მტრებისგან, რომლებიც მას რამდენიმე წლის განმავლობაში თავს ესხმოდნენ. მე ვიყავი საქართველოში 1919 წელს. ეს კულტურული ქვეყანაა და მე მას კარგად ვიცნობ. ჩემი აზრით, საქართველოს აქვს ერთა ლიგაში წევრად ყოფნის უფლება“.

ლელა სარალიძე

ლიტერატურა

გაზ. „საქართველოს რესპუბლიკა“, 1921, №27.

წყარო

საქართველოს დემოკრატიული რესპუბლიკა (1918-1921) ენციკლოპედია-ლექსიკონი

პირადი ხელსაწყოები
სახელთა სივრცე

ვარიანტები
მოქმედებები
ნავიგაცია
ხელსაწყოები