ვასაძე ლევან
NPLG Wiki Dictionaries გვერდიდან
ვასაძე ლევან – (1970), ბიზნესმენი, მწერალი, პუბლიცისტი. დაიბადა თბილისში. 1992 წელს დაამთავრა თსუ-ს გეოგრაფია-გეოლოგიის ფაკულტეტი, 1995 წელს – ქალაქ ატლანტის (აშშ) ემორის უნივერსიტეტის რობერტო გიოზუეტას სახელობის ბიზნეს-სკოლა. სხვადასხვა დროს (1997-2007) სწავლობდა და გადიოდა ტრენინგებს ნიუ-იორკის შტატის სენტ-ლოურენსის, ვაშინგტონის, მოსკოვის წმინდა ტიხონის მართლმადიდებლურ ჰუმანიტარულ უნივერსიტეტებში. არის პუბლიცისტური და ლიტერატურული სტატიებისა და ესეების ავტორი. 2010 წელს მისი ძალისხმევით კიკეთში დაარსდა სარაგბო კლუბი „იუნკერები”. 2017 წელს გამოსცა ლექსების კრებული.
- * * * (ფრაგმენტი)
- ბედნიერებამ მითხრა – ნუ მეძებ
- შენი შვილების თვალებში მნახე...
- ნაზი სამშობლოს უხლებ ველებზე
- ნაწვიმარ სიოდ გამომიძახე.
- შემხვდი შავი ზღვის ნაჩურჩულებთან,
- სადაც კოლხეთი შეხვდა დიაოხს,
- სადაც შორს წასულს ლოდინს ურეკდა
- ტალღებს მომდგარი მთების ფრიალო.
- მნახე კახეთის უდრეკ დგომაში,
- მთვარისფერ ვაზის ფოფინა ჩრდილში,
- თრიალეთს მომწყდარ შემოდგომაში
- და ჭირნახულის ჟივილ-ხივილში.
- დაზამთრებული გურიის მთებში,
- ხელიხელ ნაკრეფ ჩხავერის ტკბილში,
- საგაზაფხულედ მზა ნადურებში
- და კრიმანჭულის ჭირზე სიცილში.