იფნი კერიაში
იფნი კერიაში − გიორგი წყაროთგორული ხახაბოში (ხევსურეთი) პირველად რომ მოსულა, ერთი სახლი შეუთვალიერებია, სადაც დაარსება მოისურვა. ქადაგის პირით შეუთვალა მეკომურს, რომ სახლი დაეთმო. მეკომური არ დათანხმებულა და გამწყრალა გიორგი. ჯერ იფნის ხე ამოსულა ყვერფში (კერიაში). დაღამებისას, როცა დაწოლილან, არაფერი ყოფილა და, რომ გათენდა, შიგ კერიაში დიდი იფნი უნახავთ. ამ სახლის პატრონს მოუჭრია ხე და გადაუგდია. კიდევ ამოსულა ხე და კიდევ მოუჭრიათ. მეტჯერ აღარ ამოსულა იფნი. ერთხელ ხორცი ჩაუდგამთ ქვაბში მოსახარშად, თავად კი სამუშაოდ წასულან. მარტო ყმაწვილები ყოფილან შინ. გველი ჩამოსულა ჭერიდან საკიდელზე, ჩასულა ქვაბში და შიგ მოხარშულა. მოწამლულა ქვაბი და ყველა, ვინც კი ხორცი ჭამა, მოკვდა. გადარჩა ერთი ძუძუმწოვარა ბავშვი, რომელიც მამიდას აუყვანია და თავის ოჯახში გაუზრდია. მათ ნასახლარზე კი გიორგი წყაროთგორული დაარსდა.
