კუჭავა კახაბერ

კახაბერ კუჭავა

კახაბერ კუჭავა – დაიბადა 1979 წლის 23 სექტემბერს ქ. ქუთაისში. — იურისტი, პოლიტიკოსი

უმაღლესი განათლება მიღებული აქვს საქართველოსა და ინგლისში. 2001 წელს დაამთავრა ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტი; ხოლო 2003 წელს მიენიჭა კორპორაციული სამართლის მაგისტრის ხარისხი ნოტინგემ ტრენტის უნივერსიტეტში. კახაბერ კუჭავა ავტორია არაერთი ნაშრომისა. ასევე, გახლდათ საერთაშორისო საფინანსო კორპორაციის ჟურნალის „კორპორაციული მართვის“ გამომცემელთა საბჭოს წევრი.

კახაბერი დასაქამებული იყო იურიდიულ კომპანიაში „მგალობლიშვილი, ყიფიანი, ძიძიგური" უფროსი იურისტის პოზიციაზე (2001-2004 წწ.). ასევე, 2005 წელს საქართველოს წითელი ჯვრის საზოგადოების იურიდიული მრჩეველი გახლდათ. 2005-2007 წლებში, ის იკავებდა აშშ-ის საერთაშორისო განვითარების სააგენტოს (USAID) პროექტის „ბიზნესის გარემოს რეფორმა“ კორპორაციული სამართლის სპეციალისტის პოზიციას. 2007-2010 წწ. იგი გახლდათ საერთაშორისო საფინანსო კორპორაციის (IFC) საკორპორაციო სამართლისა და კორპორაციული მართვის ექსპერტი, ხოლო 2011-2015 წლებში დირექტორთა საბჭოს წევრი საერთაშორისო ორგანიზაციაში „საერთაშორისო სავაჭრო პალატა“. 2012-2016 წლებში კახაბერს წამყვანი პოზიციები ეკავა კერძო სექტორში მოღვაწე კომპანიებში საკონსულტაციო, საინვესტიციო და სამთო-მოპოვებით სექტორებში.

2016-2020 წლების განმავლობაში ის იყო საქართველოს პარლამენტის მეცხრე მოწვევის წევრი და გარემოს დაცვისა და ბუნებრივი რესურსების კომიტეტის თავმჯდომარე, ხოლო მოგვიანებით არჩეულ იქნა პარლამენტის თავმჯდომარის მოადგილის თანამდებობაზე. კომიტეტის თავმჯდომარეობის პერიოდში, დანერგა საპარლამენტო ზედამხედველობის არაერთი ინოვაციური მექანიზმი, რომელიც მოგვიანებით აისახა საქართველოს პარლამენტის რეგლამენტში. 2020 წლის ოქტომბერის საპარლამენტო არჩევნებში აირჩიეს „ქართული ოცნება - დემოკრატიული საქართველოს“ პარტიული სიით, საქართველოს პარლამენტის მეათე მოწვევის წევრად. 2021 წლის 27 აპრილიდან იკავებს საქართველოს პარლამენტის თავმჯდომარის თანამდებობას.

რესურსები ინტერნეტში

საქართველოს პარლამენტის ოფიციალური საიტი