ლომისა

ლომისის ეკლესია და სამრეკლო

ლომისა — სალოცავი, ქართული ხუროთმოძღვრების ძეგლი.

თათარს რომ გაუტეხია საქართველო, ჯვარ-ხატები წაუღია და შვიდი ათასი ტყვე წაუსხამს ხორასანში, იქ მთიულთა ერთი ჯვარიც ყოფილა, ლომისის ჯვარი. ხორასანში შვიდ წელიწადს მოსავალი აღარ მოდიოდა. აღარც ბავშვი ჩნდებოდა, აღარც საქონელი, არც წვიმა მოდიოდა. ბოლოს, შეწუხდა ხალხი, წავიდნენ მოლასთან. მან უთხრა: ეს ტყვეები და ეს ჯვარი თუ არ დააბრუნეთ, სულ გაწყდებითო. ადგნენ და, რომელიც მძლე ხარი ჰყავდათ, იმას დააკრეს შუბლზე ლომისის ჯვარი, შეკრიბეს შვიდი ათასი ტყვე და უთხრეს: თავისუფლები ხართო. უნდა გაუძღვეს ხარი წინ, მაგრამ არ მიდის, ტრიალებს ხარი. თურმე ერთი კოჭლი ქალი აკლდა ტყვეებში და, სანამ ის არ მოვიდა, არ დაიძრა. მოვიდა საიდანღაც კოჭლობით ქალი და ხარიც გაუძღვა ტყვეებს სამშობლოსკენ. იარა ხარმა და, სადაც კი დაისვენა, ყველგან ნიში ააშენეს. წვერზე რომ ამოვიდა, იქ მოკვდა ხარი, გასკდა.

ამ ადგილზე ააშენეს ეკლესია და ლოცულობენ. ამიტომ ამბობენ: ლომისის წმიდა გიორგის გაუმარჯოს, ხორასანს შვიდი ათასი ტყვის დამხსნელსო.

წყარო

მითოლოგიური ენციკლოპედია ყმაწვილთათვის (ქართული მითოლოგია)‏‎