მეტრეველი თამაზ

თამაზ მეტრეველი

მეტრეველი თამაზ — (1947 − 2014), ქართველი პოეტი, მწერალი, დრამატურგი, მთარგმნელი. დაიბადა თელავში. დაამთავრა თელავის მეხუთე საშუალო სკოლა და შემდეგ სწავლა განაგრძო თსუ-ს ფილოლოგიის ფაკულტეტზე. წლების განმავლობაში მუშაობდა ჟურნალისტად პრესაში და რადიო-ტელევიზიაში. ავტორია 35-მდე ორიგინალური და გადმოქართულებული პიესისა. „ზაზა ვაჩნაძის” ფსევდონიმით ჟურნალ „გზა”-ში გამოქვეყნებული აქვს ხუთი რომანი. მისი პირველი ლექსი ახალგაზრდობაზე 1965 წლის აგვისტოში გაზეთ „თბილისში” დაიბეჭდა; გამოცემული აქვს ლექსების კრებულები: „სულის სანთლები” (2014) და „სასწაული”.

გაზაფხული

გაზაფხულდა, გაზაფხულდა,

მზის სხივებმა გვახარეს...

ყვავილებმა ჭრელი ფთილა

მიწას მიმოაფარეს.

არაკრაკდა ნაკადული

აშრიალდა ტყეები,

თოვლი გაქრა, ყინვა გადნა,

დადგა თბილი დღეები.

მივულოცოთ ყველას, ყველას

დიდებსა და პატარებს,

ვისაც ქვეყნად გაზაფხულის

მოსვლა ასე ახარებს.

წყარო

ქართველი პოეტები (ენციკლოპედია)