ნუმიტორი
NPLG Wiki Dictionaries გვერდიდან
ნუმიტორი – (რომ.) ალბა-ლონგას ლეგენდარული მეფე. ენეასის ჩამომავალი, რომულუსის და რემუსის პაპა.
ნუმიტორი, ალბა-ლონგას კანონიერი მეფე, ტახტიდან ჩამოაგდო მისივე ძმამ, ამულიუსმა. მანვე მოკლა მისი ვაჟები, ქალიშვილი კი, რეა-სილვია, ვესტას ტაძარში წარგზავნა ვესტალისად. რეა სილვიამ ტყუპი ვაჟი შვა – რომულუსი და რემუსი. ეს რომ ამულიუსმა გაიგო, ვესტალისის მოკვლა და ბავშვების ტიბერისში გადაგდება ბრძანა. მითოსის ერთ-ერთი ვერსიის თანახმად, ნუმიტორმა (სხვა ვერსიით, არესმა) იხსნა თავისი შვილიშვილები და აღსაზრდელად მიაბარა მწყემს ფაუსტულუსს. როცა რომულუსი და რემუსი წამოიზარდნენ, ნუმიტორმა მათი დახმარებით კვლავ დაიბრუნა სამეფო ტახტი, შვილიშვილებს კი უბოძა მიწა დიდი ქალაქის დასაარსებლად. და ეს ქალაქი იყო რომი.
