პერუ
პერუ - (Peru – პერუს რესპუბლიკა), სახელმწიფო სამხრეთ ამერიკის დასავლეთ ნაწილში, წყნარი ოკეანის სანაპიროზე.
ფართობი - 1,300 მლნ. კმ2.
მოსახლეობა - 30 მლნ. კაცი (2012).
ოფიციალური ენები – ესპანური, კეჩუა, აიმარა.
დედაქალაქი – ქ. ლიმა.
ადმინისტრაციულად იყოფა 25 რეგიონად და ერთ განსაკუთრებული სტატუსის მქონე ლიმის რეგიონად. სახელმწიფოს მეთაურია პრეზიდენტი. საკანონმდებლო ხელისუფლებას ახორციელებს ორპალატიანი პარლამენტი (კონგრესი), აღმასრულებელს – პრეზიდენტი და მინისტრთასაბჭო (მთავრობა). დამოუკიდებლობა გამოაცხადა 1821 წელს.
პერუ აგრარულ-ინდუსტრიული ქვეყანაა განვითარებული სამთომოპოვებითი მრეწველობით (ფერადი ლითონების, რკინის მადნის, ნავთობის და აირის მოპოვება). სოფლის მეურნეობის მთავარი კულტურებია: შაქრის ლერწამი, ყავა, მარცვლეული, კარტოფილი, ასევე საზღვაო თევზჭერა.
სამხედრო მრეწველობა აწარმოებს საარტილერიო და ცეცხლსასროლ იარაღს, ტყვია-წამალს, ასაფეთქებელ ნივთიერებას, მნიშვნელოვანი დარგია მსუბუქი თვითმფრინავების და მცირე ხომალდების მშენებლობა.
საზღვაო პორტებია: ჩიმბოტე, კალიაო, სან-ნიკოლასი, ტალარა, ილო, პაიტა.
სამდინარო პორტი (ამაზონზე) – იკიტოსი. საერთაშორისო აეროპორტი – ხორხე ჩავესი (ლიმა).
შეიარაღებული ძალები საერთო შემადგენლობით 115 ათ. კაცი (2012). სახმელეთო ჯარები 74 ათ., სამხედრო-საჰაერო 18 ათ და სამხედრო-საზღვაო 23 ათასი, სანაპიროს დაცვა 1 ათ. დაკომპლექტება ხორციელდება შერეული პრინციპით.
