საყვარელიძე რამაზ

NPLG Wiki Dictionaries გვერდიდან
(გადმომისამართდა რამაზ საყვარელიძე-დან)
გადასვლა: ნავიგაცია, ძიება
რამაზ საყვარელიძე

საყვარელიძე რამაზ - Sakvarelidze Ramaz, Сакварелидзе Рамаз, 1950-

ქართველი ფსიქოლოგი, ფსიქოლოგიის მეცნიერებათა კანდიდატი ანუ აკადემიური დოქტორი (1980), პროფესორი. დაამთავრა თბილისის სახელმწიფო უნივერსიტეტის (თსუ) ფსიქოლოგიის ფაკულტეტი (1973). პედაგოგიურ და სამეცნიერო მუშაობას ეწეოდა თსუ-ს ზოგადი ფსიქოლოგიის კათედრაზე ჯერ ასისტენტის (1980 წლამდე) და შემდეგ დოცენტის თანამდებობაზე (2006 წლამდე). 1979-1987 წლებში იყო თსუ-ს ფილოსოფიისა და ფსიქოლოგიის ფაკულტეტის დეკანის მოადგილე; 1990-1996 წლებში − განათლების სამინისტროსთან არსებული გამოყენებითი ფსიქოლოგიის რესპუბლიკური სამეცნიერო ცენტრის ხელმძღვანელი; 1999-2006 წლებში − თბილისის სახელმწიფო სამედიცინო ინსტიტუტის ზოგადი და კლინიკური ფსიქოლოგიის კურსის (კათედრის) ხელმძღვანელი; 2006-2010 წლებში იყო კავკასიის სამართლის სკოლის პროფესორი. ხოლო 2006 წლიდან დღემდე არის იმავე უნივერსიტეტის ფსიქოლოგიის დეპარტამენტის ხელმძღვანელი. „ფსიქოლოგიის ქართული ლექსიკონის” ერთერთი ავტორია.

რ. საყვარელიძემ ფსიქოლოგიური გამოკვლევები დაიწყო ფსიქოლინგვისტიკაში, კერძოდ ბილინგვიზმის მიმართულებით. საკანდიდატო დისერტაციაში ექსპერიმენტულად დაასაბუთა, რომ ბილინგვიზმის დროს ხდება ფიქსირებულ განწყობათა ასიმილაციური ურთიერთგავლენა, რაც, თავის მხრივ, იმას ასაბუთებს, რომ სიტყვათხმარების საფუძველი ფიქსირებული განწყობაა (ენობრივი განწყობა).

მოგვიანებით რ. საყვარელიძე დაინტერესდა განწყობის ფსიქოლოგიის მეთოდოლოგიური და თეორიული საკითხებითა და განწყობის თეორიის ფსიქოთერაპიაში გამოყენების პერსპექტივით. თეორიული ანალიზის საფუძველზე მან დაასკვნა, რომ მოთხოვნილება და ემოცია განწყობის ფორმებია და ემოციის თერაპია განწყობის შეცვლაში მდგომარეობს.

რ. საყვარელიძე იყო საქართველოს პარლამენტის ორი მოწვევის წევრი, სახელმწიფოს მეთაურის პრესმდივანი.

მთავარი ნაშრომები


წყარო

ფსიქოლოგიის ქართული ლექსიკონი
სტატიის ავტორი - ირაკლი იმედაძე, დიმიტრი უზნაძის სახელობის საქართველოს ფსიქოლოგთა საზოგადოება.
ლექსიკონი შეიქმნა შოთა რუსთაველის ეროვნული სამეცნიერო ფონდის გრანტით.

იხილე აგრეთვე

რამაზ საყვარელიძე

პირადი ხელსაწყოები
სახელთა სივრცე

ვარიანტები
მოქმედებები
ნავიგაცია
ხელსაწყოები