სადაზვერვო რაზმი
სადაზვერვო რაზმი – ტაქტიკური დაზვერვის ორგანო, რომელიც საერთო-საჯარისო შენაერთისგან (ნაწილისგან) გამოიყოფა ყველაზე მნიშვნელოვან მიმართულებაზე მოწინააღმდეგის და ადგილმდებარეობის შესახებ ცნობების მოსაპოვებლად, უმთავრესად შეტევაში და მარშზე შემხვედრი ბრძოლის მოლოდინში.
თავდაცვაში სადაზვერვო რაზმი შეიძლება გაიგზავნოს მოწინააღმდეგესთან უშუალო შეხების არარსებობის შემთხვევაში. სადაზვერვო რაზმში, ჩვეულებრივ, ინიშნება ქვეითი (სატანკო, სადაზვერვო, საპარაშუტო-სადესანტო, საზღვაო ქვეითი ჯარის) ასეული ან ქვეითი ბატალიონი, რომელიც გაძლიერებულია ტანკებით, არტილერიით, მესანგრეებით და სხვა. თავის მხრივ, იგი გზავნის სადაზვერვო მზირებს. სადაზვერვო რაზმი ეწევა დაზვერვას თვალთვალით, ადგილმდებარეობის დათვალიერებით, ჩასაფრებით, თავდასხმებით, ხოლო საჭიროების შემთხვევაში – ბრძოლითაც.
