საინჟინრო ჯარები
საინჟინრო ჯარები – სპეციალური ჯარები, განკუთვნილი საინჟინრო უზრუნველყოფის იმ ყველაზე რთული ამოცანების შესასრულებლად, რომლებიც სპეციალურ მომზადებას და საინჟინრო შეიარაღების საშუალებების გამოყენებას მოითხოვენ.
საინჟინრო ჯარები არის ბევრი სახელმწიფოს არმიებში. პირველად გაჩნდა საფრანგეთში – XVII საუკუნეში. II მსოფლიო ომის დროს საინჟინრო ჯარები აწყობდნენ ხერგილებს და იწვევდნენ ნგრევას მოწინააღმდეგის დამრტყმელი დაჯგუფებების შეტევის გზებზე, აწყობდნენ თავდაცვის ზღუდეებს, შეტევის დროს აწარმოებდნენ საინჟინრო დაზვერვას, გაჰყავდათ გასასვლელები მოწინააღმდეგის ღობურებში, უზრუნველყოფდნენ წყლის ზღუდეების ფორსირებას, გზების მომზადებას ჯარების წინ წაწევის და მანევრისათვის, დაკავებული ზღუდეების გამაგრებას და სხვა.
თანამედროვე არმიების საინჟინრო ჯარები შედგება სხვადასხვა დანიშნულების შენაერთებისგან, ნაწილებისა დაქვედანაყოფებისაგან: საინჟინრო–მესანგრეთა (მესანგრეთა), მოიერიშე, ღობურების დაყენების და განღობვის, საინჟინრო–საგზაო, ხიდმშენებელი (ხიდური), პონტონხიდური (პონტონები), დესანტგადამსხმელი (ამფიბიები), პოზიციური, შენიღბვის, საველე წყალმომარაგების (წყლის მოპოვებისა და გაწმენდის), საინჟინრო–სამშენებლო და სხვა. ზოგიერთ არმიაში არის საინჟინრო ნაწილები და ქვედანაყოფები ბირთვული ნაღმების (ფუგასების) გამოსაყენებლად.
ორგანიზაციულად საინჟინრო ჯარები შედიან გაერთიანებების, შენაერთებისა და ნაწილების შემადგენლობაში.
