საომარი მოქმედებების თეატრი
საომარი მოქმედებების თეატრი – კონტინენტის ვრცელი ტერიტორია მიმდებარე ზღვის ან ოკეანის (ზღვის) აკვატორიით, კუნძულებითა და კონტინენტის სანაპიროთი. აგრეთვე საჰაერო კოსმოსური სივრცე, რომლის ფარგლებშიც გაიშლება შეიარაღებული ძალების სტრატეგიული დაჯგუფებები და შეიძლება წარმოებდეს სტრატეგიული მასშტაბის საომარი მოქმედებები.
გეოგრაფიული მდებარეობის მიხედვით საომარი მოქმედებების თეატრი შეიძლება იყოს კონტინენტური, საოკეანო და საზღვაო. თითოეულ მათგანს აქვს გარკვეული სამხედრო-პოლიტიკური, სამხედრო-ეკონომიკური, სამხედრო ფიზიკურ-გეოგრაფიული და ეთნოლოგიური თავისებურებები. ასევე ტერიტორიის ოპერატიული მოწყობა, რომელიც გავლენას ახდენს სტრატეგიული მასშტაბის ოპერაციების და ომის მომზადებაზე.
საომარი მოქმედებების თეატრის საზღვრებსა და შემადგენლობას ადგენს სახელმწიფოების (სახელმწიფოების კოალიციის) სამხედრო-პოლიტიკური ხელმძღვანელობა. მაგალითად, აშშ-სა და ნატოს სამხედრო-პოლიტიკურმა ხელმძღვანელობამ, ტერიტორიის გეოგრაფიული თავისებურებებიდან და გაერთიანებული შეიარაღებული ძალების ამოცანებიდან გამომდინარე, დასავლეთ ევროპის მთელი ტერიტორია დაყვეს სამ სახმელეთო საომარი მოქმედებების თეატრად: ნატოს ჩრდილო-დასავლეთ ევროპული, ცენტრალურ-ევროპული და სამხრეთევროპული. თითოეულ თეატრში მშვიდობის დროს შექმნილია ნატოს გაერთიანებული შეიარაღებული ძალების დაჯგუფებები ერთიანი სარდლობით; დაგეგმილია მათი შესაძლო გამოყენება, ჩამოყალიბებულია მართვის, ბაზირების და მომარაგების სისტემები. ისტორიულად დამკვიდრებულ საოკეანო საომარი მოქმედებების თეატრებს წარმოადგენენ ატლანტის, წყნარი, ინდოეთის და ჩრდილო ყინულოვანი ოკეანეები. შიდა და კონტინენტების მიმდებარე, სამხედრო-გეოგრაფიული თვალსაზრისით გამოცალკევებული ზღვების აკვატორიები მათში განლაგებული კუნძულებით, კონტინენტების სანაპირო ზოლითა და საჰაერო-კოსმოსური სივრცით შეიძლება მთელ რიგ ქვეყნებში ქმნიდეს საზღვაო საომარი მოქმედებების თეატრებს.
ტერმინის „საომარი მოქმედების თეატრის“ სინონიმად დასავლურ ლიტერატურაში იხმარება „ომის თეატრის“ ცნება. საომარი მოქმედებების თეატრების შესწავლა და შეფასება შეიარაღებული ძალების და ტერიტორიის დაცვის ერთ-ერთ უმნიშვნელოვანეს ამოცანას წარმოადგენს. ის საშუალებას იძლევა, აწარმოონ საომარი მოქმედებები ნებისმიერ რეგიონში.
