ფუძის ანგელოზი
ფუძის ანგელოზი – უკანახოში (ხევსურეთში) იმ ადგილას, სადაც ახლა ფუძის ანგელოზია დაარსებული, ერთ უკანახოელ კაცს ძროხა დაჰკარგვია. ბევრი ძებნის შემდეგ უპოვნია. ხედავს, ძროხას ხბო მოუგია და წევს. დაეზიდა პატრონი იმ ხბოს ასაყვანად, მაგრამ ვერა და ვერ ასწია. გაანება თავი, წავიდა და შეეკითხა ხალხს, ძროხა ვიპოვნე, ხბო მოუგია და ვერ ავწიე, ვერ წამოვიყვანეო. ხბოს როგორ ვერ მოერიეო, უთხრეს, მაგრამ თავადაც რომ ვერ ასწიეს ახალმოგებული ხბო, დალოცეს ის ადგილი და შეეხვეწნენ: ამ ადგილის ფუძის ანგელოზო, როცა დრო მოუვა, გაგვაგებინე და აქ დავკლავთო. ამდგარა ძროხა და წამოსულა სოფელში, ხბოც უკან გამოკიდებია.
გავიდა ხანი და გაიზარდა ბოჩოლა გახდა კურატი. ამდგარა ეს კურატი და წამოსულა ბუბუნით, უკან გამოყოლიან პატრონები: აბა, ვნახოთ, სად წავაო, წასულა ეს კურატი და, სადაც დაიბადა, იქ დაწოლილა. გვარის უფროსს დაუკლავს და უთქვამს: ამ ფუძის ანგელოზო, შენს სადიდებულოდ იყოს ეს ხარ-მარეშიო (ხარ-მარეში ჯვართენაზე შესაწირავ საქონელს ნიშნავს).
