ღამბაშიძე ვანდა

ღამბაშიძე (ჰოპე) ვანდა (დ. - 1876, ნიუ-ჯერსი, აშშ - გ. - 1945, პარიზი) - ცნობილი ექიმისა და საზოგადო მოღვაწის, ვახტანგ ღამბაშიძის, მეუღლე, თბილისის სახელმწიფო უნივერსიტეტის ინგლისური ენის პირველი პედაგოგი (1918-1921), თბილისის ქალთა სასწავლებლის მასწავლებელი.

1918 წლის იანვარში ივანე ჯავახიშვილმა ახლად დაარსებული უნივერსიტეტის ინგლისური ენის პედაგოგად მოიწვია. ქართული უნივერსიტეტის პირველი სტუდენტი სწორედ მისი შვილი მედეა ღამბაშიძე იყო. 1918-1921 წლებში იყო „წითელი ჯვრის” წარმომადგენლობის ერთ-ერთი ხელმძღვანელი. ტაბახმელასთან ბრძოლების დროს თავის მოსწავლეებსა და სტუდენტებთან ერთად ფრონტის წინა ხაზზე იდგა და ჰუმანიტარულ მისიას შესანიშნავად ართმევდა თავს. საქართველოს ოკუპაციის შემდეგ უკვე სტამბოლში ხელმძღვანელობდა საქართველოდან დევნილთა დაბინავებისა და მათთვის პოლიტიკური თავშესაფრის გამოძებნის საქმეს, საიდანაც შემდგომ პარიზში გაემგზავრა ოჯახთან ერთად.

მანანა ლილუაშვილი

ლიტერატურა

ზ. გაიპარაშვილი, მ. ლილუაშვილი, ტფილისის სახელმწიფო უნივერსიტეტის პროფესორთა საბჭოს ოქმები 1917-1926, თბ., 2006.

წყარო

საქართველოს დემოკრატიული რესპუბლიკა (1918-1921) ენციკლოპედია-ლექსიკონი