შამანაძე შადიმან

შადიმან შამანაძე

შამანაძე შადიმან − (1958), ქართველი დრამატურგი, მთარგმნელი, მწერალი, სცენარისტი. დაიბადა ლანჩხუთში. 1975 წელს დაამთავრა თბილისის 48-ე საშუალო სკოლა. 1975-80 წლებში სწავლობდა თსუ-ს ფილოლოგიის ფაკულტეტზე, პარალელურად კი − რიგის სახელმწიფო უნივერსიტეტის ფილოლოგიის ფაკულტეტზეც. 1981-1991 წლებში იყო მწერალთა კავშირის თარგმანის მთავარი სარედაქციო კოლეგიის თანამშრომელი; მწერალთა კავშირის მხატვრული თარგმანის საგამომცემლო ცენტრ „ხომლის” დირექტორი; ლიტერატურულ ჟურნალ „არილის” მთავარი რედაქტორი. გამოცემული აქვს ლექსების რამდენიმე კრებული (მათ შორის − „ფასადი”, 1986; პიესები; არის ავტორი სცენარისა ფილმისთვის „მხოლოდ ერთხელ”.

ხმით მიწის დანატირალი

სიმართლის ამარა დარჩენილან

ქართლის ბაღები და ველ-მინდორი.

ძილში ომისაგან ჩარჩენილ ხმას

ახშობს დღე პირველი, დღე მეორე...

ნეტა კი შემეძლოს, ჭერად ვექცე

ყველა დევნილსა და რჩენილს მარტოდ.

ცალ-ცალი სცმევია ჩექმაც ფეხზე

დიდი იმპერიის რესტავრატორს.

აღა-მაჰმად ხანის დამწვარ თბილისს,

შაჰ-აბასის მიერ აჭრილ ვენახს,

ახლა რუსის ტანკი გადაუვლის,

დედაბუდიანად გამითელავს.

ქურთა, ერედვი და კარალეთი

ჩუმად მისტირიან სახლიკაცებს.

მალე გაუწყრებათ მამა ღმერთი,

მათ, ვინც ქართლის მიწა დაიტაცეს!

ტკივილს როგორ უხმოდ იშუშებენ,

მუდამ თავმდაბალი ქართლელები.

გულში კირად წვავენ შიშველ შიშს და

ვერგასათევ ღამეს ათენებენ.

ომმა გულისგულში ჩამახედა,

ყველა გრძნობის მოხდა ლუსტრაცია.

ქართლის მიწა ისევ ჩახმახზე დგას,

რუსით ნუ მაშინებ, თუ კაცი ხარ...

წყარო

ქართველი პოეტები (ენციკლოპედია)