შლიფენის გეგმა 1905
შლიფენის გეგმა 1905 – გერმანიის ჯარების სტრატეგიული გაშლისა და ორ ფრონტზე (საფრანგეთისა და რუსეთის წინააღმდეგ) ომის დაწყების გეგმა. 1905 წელს შეიმუშავა გენერალური შტაბის უფროსმა ალფრედ ფონ შლიფენმა (1833–1913), რომელიც 1911 წლიდან იყო გენერალ-ფელდმარშალი.
შლიფენის გეგმის მიხედვით, პირველი დარტყმა საფრანგეთის წინააღმდეგ მთავარი ძალებით (სახმელეთო ჯარების 85%) უნდა განხორციელებულიყო მარჯვენა ფრთიდან ნეიტრალური სახელმწიფოების – ბელგიის, ნიდერლანდისა და ლუქსემბურგის ტერიტორიების გავლით. გერმანელთა არმიებს სწრაფად უნდა შემოევლოთ პარიზისათვის დასავლეთიდან და ალყაში მოექციათ და გაენადგურებინათ საფრანგეთის ჯარები. ამის შემდეგ დაგეგმილი იყო მთავარი ძალების გადასროლა აღმოსავლეთის ფრონტზე და რუსეთის არმიის განადგურება.
I მსოფლიო ომის დაწყების დროს გენერალური შტაბის ახალმა უფროსმა, ფონ მოლტკე უმცროსმა, რამდენადმე შეცვალა შლიფენის გეგმა, შეასუსტა დამრტყმელი მარჯვენა ფრთა, რათა ფრონტის დანარჩენი უბნები არ დარჩენილიყვნენ სათანადო დაცვის გარეშე. ეს, სავარაუდოდ, პარიზთან გერმანელების დამარცხების მიზეზი გახდა. II მსოფლიო ომის დროს შლიფენის გეგმა (გარკვეული ცვლილებებით) კვლავ გამოიყენეს საფრანგეთის წინააღმდეგ (1940).