არქიტექტურა
არქიტექტურა, ხუროთმოძღვრება − ხელოვნების ერთ-ერთი დარგი. შენობების, აგრეთვე სხვა ნაგებობების და მათი კომპლექსების დაპროექტება, აშენება. ამავე დროს მატერიალური წარმოებისა და მხატვრული შემოქმედების სფერო.
არქიტექტურული სტილი
არქიტექტურული სტილი გულისხმობს სტილის იმ კატეგორიათა ერთობლიობას, რომლის მიხედვითაც შესაძლებელი ხდება არქიტექტურის კლასიფიკაცია გარკვეულ ისტორიულ-მხატვრული პერიოდებით (ბაროკო, როკოკო და სხვ.). სტილის ჩამოყალიბება დამოკიდებულია კლიმატურ, ტექნიკურ, რელიგიურ და კულტურულ ფაქტორებზე.
უნდა აღინიშნოს, რომ სხვადასხვა სტილი ყოველთვის არ ენაცვლება ერთმანეთს. ხელოვნების ისტორიაში ცნობილია სხვადასხვა სტილის ერთდროული თანაარსებობა, როგორც ერთმანეთის ალტერნატივა, (მაგალითად, ბაროკო და კლასიციზმი, ფუნქციონალიზმი, კონსტრუქტივიზმი და არტ დეკო).
არქიტექტურული სტილი, ისევე როგორც ზოგადად სტილი ხელოვნებაში, პირობითი ცნებაა. იგი მოსახერხებელია ევროპული არქიტექტურის ისტორიის გასააზრებლად.
ევროპულ კულტურაში გამოარჩევენ შემდეგ არქიტექტურულ სტილებს:
- უძველესი არქიტექტურა
- რომანული არქიტექტურა
- გოთიკური არქიტექტურა
- ბაროკოს არქიტექტურა
- როკოკოს არქიტექტურა
- კლასიცისტური არქიტექტურა
- ეკლექტიკური არქიტექტურა
- მოდერნისტული არქიტექტურა
- პოსტმოდერნისტული არქიტექტურა
- ჰაი-ტექ არქიტექტურა
- დეკონსტრუქტივისტული არქიტექტურა
