ბაიაზიდ I

ბაიაზიდ I, ილდირიმი (თურქეთი – ელვა) (1354 ან 1360 – 1403), ოსმალეთის სულთანი (1389-1402). აგრძელებდა თავის წინამორბედთა დამპყრობლურ პოლიტიკას. მისი ხელმძღვანელობით ოსმალთა ჯარმა დაიპყრო სერბია (1389), ბულგარეთი (1393-96), მაკედონია, თესალია. 1396 წელს ნიკოპოლთან, დუნაიზე, დაამარცხა ჯვაროსანთა ლაშქარი, დაიმორჩილა ბოსნია და განამტკიცა ოსმალთა პოზიციები ბალკანეთის ნახევარკუნძულზე.

ანატოლიაში ბაიაზიდ I-მა დაიმორჩილა ოსმალთა საამიროები. 1394-1401 წლებში რამდენიმეჯერ ალყა შემოარტყა კონსტანტინოპოლს. 1402 წელს შეებრძოლა ანატოლიაში შეჭრილ თემურლენგს, მაგრამ ანგორასთან (ანკარის ძვ. სახელწოდება) დამარცხდა და ტყვედ ჩავარდა. გარდაიცვალა ტყვეობაში.

წყარო

ქართული სამხედრო ენციკლოპედიური ლექსიკონი. აკადემიკოსის, გენერალ-მაიორ ელგუჯა მეძმარიაშვილის საერთო რედაქციით, - თბილისი 2017