შალამანდილი
შალამანდილი – (Salvia glutinosa L.); ოჯახი: ტუჩოსნები (Lamiaceae). მრავალწლიანი ბალახოვანი მცენარეა, 40-80 სმ სიმაღლის. ღერო მეტწილად სწორია, მარტივი, ხშირად ფოთლების იღლიებში ან დამოკლებული ყლორტებია განვითარებული, ან დატოტვილია. ყველა ფოთოლი ყუნწიანია, შუბის ან კვერცხის ფორმის, კაშკაშა მწვანე ფერის, ორივე მხარეზე თხლად თეთრი ბეწვით შებუსული, საკმაოდ ჯირკვლოვანია. ყვავილები შეკრებილია მტევნისებურად, ზოგჯერ საგველასებურ ყვავილედებად. გვირგვინი ღია ყვითელი ფერისაა, ქვედა ტუჩი მოთეთრო ან მოწითალო მოხატულობისაა. ყვ. ნაყ. IX-X. იზრდება დაჩრდილულ ტყეებში. კახეთში მისი ნახვა შესაძლებელია ყველგან. გავრცელებულია მთელ საქართველოში.
წყარო
კახეთის რეგიონის მცენარეები – 400 სახეობის მცენარე და 402 ფოტო; სარკვევზე იმუშავა კახაბერ სუხიტაშვილმა; რედაქტორი მაია ახალკაცი, თბილისი 2016.
