ასპინძის ბრძოლა 1770
ასპინძის ბრძოლა 1770 – ქართველების ბრძოლა ოსმალების წინააღმდეგ 1770 წლის 20 აპრილს სოფელ ასპინძასთან 1768–74 წლების რუსეთ-ოსმალეთის ომის დროს. ამ ომში ქართველები რუსეთის მოკავშირეებად გამოდიოდნენ.
1770 წლის გაზაფხულზე ქართლ-კახეთის მეფე ერეკლე II 7 ათასიანი ლაშქრით და რუსი გენერალი ტოტლებენი 1200 ჯარისკაცით ახალციხის საფაშოში შეიჭრნენ. ერეკლეს მიზანი იყო ქართული მიწების განთავისუფლება ოსმალთა ბატონობისაგან, მაგრამ ტოტლებენი, რომელსაც, როგორც შემდეგ გაირკვა, ქართლ-კახეთის ხელში ჩაგდება და რუსეთისათვის გადაცემა სურდა, მოულოდნელად უკან გაბრუნდა თავისი რაზმით. ოსმალები შეეცადნენ მოკავშირის გარეშე დარჩენილი ქართველების განადგურებას, მაგრამ ერეკლემ ზედიზედ დაამარცხა ჯერ მათი 1500 კაციანი რაზმი, ხოლო შემდეგ ლეკ-ოსმალთაგან შემდგარი 4 ათასიანი (სხვა ცნობებით, 8 – ათასიანი) კორპუსი. მოწინააღმდეგის ნარჩენებმა გაქცევით უშველეს თავს.
