გერშვინი ჯორჯ

18:00, 1 მაისი 2017-ის ვერსია

ჯორჯ გერშვინი

გერშვინი ჯორჯ - George Gershwin (26. IX, 1898, ბრუკლინი, ნიუ-იორკი, – 11. VII. 1937, ბევერლი-ჰილზი, კალიფორნია), ამერიკელი კომპოზიტორი და პიანისტი.

დაიბადა რუსეთიდან ემიგრირებული ებრაელის (გერშოვიჩის) ოჯახში. როგორც კომპოზიტორმა, სახელი გაითქვა ჯაზური სიმღერებითა და რევიუს ტიპის ოპერეტებით (მიუზიკლი). 1924 მან დირიჟორ პ. უაიტმენის წინადადებით დაწერა განთქმული „რაფსოდია ბლუზის ტონებში“ ფორტეპიანოსა და ორკესტრისათვის („ცისფერი რაფსოდია“). მის შემოქმედებაში პირველად მოხდა შერწყმა ევროპული სიმფონიზმისა და ჯაზური მუსიკისა. სამხრეთის შტატების ზანგებისა და აფრიკულ-ამერიკული ფოლკლორის (ბლუზი, სპირიჩუელი) შესწავლის შედეგად კომპოზიტორმა შექმნა თავისი უმნიშვნელოვანესი ნაწარმოები – პირველი ამერიკული ეროვნული ოპერა „პორგი და ბესი“ (1935), ოპერა გამოირჩევა მღერადობით, რიტმული სიმდიდრით, გამომსახველობით. იგი წარმატებით იდგმება მსოფლიოს მრავალ ქალაქში (დაიდგა აგრეთვე თბილისის კონსერვატორიის საოპერო სტუდიაში).

გერშვინს ეკუთვნის აგრეთვე რამდენიმე ოპერეტა და მიუზიკლი, სიმფონიური სიუიტა „ამერიკელი პარიზში“ (1928), საფორტეპიანო კონცერტი (1925), 300-მდე სიმღერა და სხვა.

წყარო

მუსიკის ენციკლოპედიური ლექსიკონი / [შემდგ.: ანზორ თამარაშვილი; მთ. რედ.: გულბათ ტორაძე]. [ახალციხე: თბილ. უნ-ტის მესხეთის ფილიალის გამ-ბა], 2005 (ა.ო. "პროგრესი")