გორის სასულიერო სასწავლებელი
გორის სასულიერო სასწავლებელი - ერთ-ერთი პირველი სასულიერო სასწავლებელი საქართველოში. გაიხსნა 1817 წ. სასწავლებლის მატერიალური უზრუნველყოფა, მიტროპოლიტ თეოფილაქტეს განკარგულებით, რუისის არქიმანრდიტ ნიკიფორეს დაევალა, ხოლო სასწავლო პროგრამებით, სახელმძღვანელოებითა და ინსტრუქციებით იგი თბილისის სასულიერო სემონარიამ მოამარაგა. თავდაპირველად მართლმადიდებლების გარდა, სასწავლებელში კათილიკეები და გრიგორიანელებიც მიიღეს – სულ 48 მოსწავლე, რომელთა ასაკი 6-დან 17 წლამდე იყო. ამგვარი განსხვავება ასაკში, ცხადია, უარყოფით გავლენას მოახდენდა სასწავლო პროცესზე. 1836 წელს გორის სასულიერო სასწავლებელს სამისიონერო ხასიათი მიეცა.
აქ ისწავლებოდა რუსული და ძველი სლავური გრამატიკა, არითმეტიკა, საეკლესიო გალობა, კატეხიზისი, ბერძნული და ლათინური ენები (პირველდაწყებითი კურსი), საღვთო სჯული და სხვ. ყურადღება ექცეოდა თარგმანს (ქართულიდან რუსულად და პირუკუ) სასწავლებელს ჰქონდა მდიდარი ბიბლიოთეკა (ფონდი დაცულია ი. გოგებაშვილის სახ. სახალხო განათლების ბიბლიოთეკაში.
გორის სასულიერო სასწავლებელში სხვადასხვა დროს სწავლობდნენ ი. გოგებაშვილი, ლ. კეცხოველი, ნ. ლომაური, ს. მგალობლიშვილი, ი. ჯუღაშვილი და სხვ. გორის სასულიერო სასწავლებელ დაიხურა 1917 წ.
წყარო
- საქართველოს ისტორიისა და კულტურის ძეგლთა აღწერილობა
- ღირსი მამა გიორგი მთაწმინდელის გორის გიმნაზიის ოფიციალური საიტი
