დავით III
დავით III დიდი, კუროპალატი - (გ. 1001), ბაგრატიონთა ტაოს შტოს წარმომადგენელი, ტაოს მეფე. მისი მმართველობის ხანა ტაოს სამეფოს პოლიტიკური გაძლიერებისა და ტერიტორიული გაფართოების პერიოდია.
979 წელს დავით III 12 ათ. მეომრით დაეხმარა ბიზანტიის ცენტრალურ ხელისუფლებას ამბოხებული მხედართმთავრის – ბარდა სკლიაროსის დამარცხებაში. ამისთვის დავით III-მ ევფრატისა და ჭოროხის სათავეებში მდებარე მიწები მიიღო.
988 წელს დავით III კვლავ ჩაერია ბიზანტიელთა შინაომში, ამჯერად იმპერატორის წინააღმდეგ აჯანყებული ფეოდალების მხარეზე. აჯანყების ჩახშობის შემდეგ დავით III იძულებული გახდა პატიება ეთხოვა იმპერატორისათვის და აღუთქვა, რომ გარდაცვალების შემდეგ მისი სამფლობელო იმპერიას გადაეცემოდა.
დავით III აქტიურად იბრძოდა, აგრეთვე დასავლეთ სომხეთში გაბატონებული მუსლიმანი ფეოდალების წინააღმდეგ: 990 წელს მაჰმადიან მფლობელებს წაართვა ქ. მანაზკერტი, 997 წელს ალყა შემოარტყა ქ. ხლათს ვანის ტბის სანაპიროზე, 998 წელს დაამარცხა აზერბაიჯანის ამირა მამლანის ლაშქარი.
დავით III-ის მხადაჭერით განხორციელდა მისი შვილობილის ბაგრატის (ბაგრატ III) გამეფება ქართლსა და აფხაზეთში (975-978), რამაც საფუძველი ჩაუყარა ერთიანი ქართული სახელმწიფოს შექმნას.
