ვაშლისუნა (Primula luteola Rupr.)
NPLG Wiki Dictionaries გვერდიდან
ვაშლისუნა - (Primula luteola Rupr.); ოჯახი: ფურისულისებრნი (Primulaceae). მრავალწლიანი ბალახოვანი მცენარეა. ფოთლები გლუვია, გრძელი, მოგრძო-ლანცეტა ან მოგრძო-ელიფსური ფორმის, გრძელ ყუნწად წარზიდული, კიდეებზე წვრილად დაკბილული. საყვავილე ღერძი გრძელია, ზედა ნაწილში ნაფიფქითაა დაფარული. გვირგვინი მკრთალი ყვითელია. ყვ. ნაყ. V-VII. მცენარე იზრდება ტენიან მდელოებზე, დაჭაობებულ ადგილებსა და სველ კლდეებზე ტყის შუა სარტყლიდან ალპურ სარტყლამდე. კახეთში მისი ნახვა შესაძლებელია მდინარე სტორის ხეობაში, თუშეთის დაცულ ტერიტორიაზე. გავრცელებულია სვანეთსა და ხევსურეთში. მცენარე აღწერილია თუშეთში 1869 წელს. დიდი კავკასიონის ენდემია.
