იანეთი (სამტრედიის მინიციპალიტეტი)
იანეთი – სოფელი დასავლეთ საქართველოში, ქვემო იმერეთში (სამტრედიის რ.). მდებარეობს იმერეთის დაბლობზე, მდინარე გუბისწყლის მარჯვენა ნაპირზე. ზღვის დონიდან 30 მეტრი, სამტრედიიდან 7 კმ-ში.
როგორც უკვე სარწმუნოდაა გარკვეული, იანეთი მომდინარეობს პიროვნული ივან-ეთ-ი-საგან ფუძეში ვ თანხმოვნის ჩავარდნის გზით. იგი ისევეა -ეთ სუფიქსით წარმოქმნილი, როგორც სხვა ანთროპონიმული ტოპონიმები: გობრონ-ეთ-ი, სიმონ-ეთ-ი, ბასილ-ეთ-ი, გრიგოლ-ეთ-ი და სხვ.
ადგილობრივ სოფლის წარმოშობის თაობაზე კი ერთი საკმაოდ გულუბრყვილო გადმოცემა არის გავრცელებული: „ამ სოფელში ერთხელ მომხდარა მკვლელობა. დააბრალეს რუსს, რომელსაც მაშინ აქ უცხოვრია. რუსს თავი უმართლებია და შეკრებილი ხალხისათვის უთქვამს: „Я нет – я нет!“ მას შემდეგ სოფლისთვის იანეთი დაურქმევიათო“. (კუკური ილიას ძე კოპალეიშვილი ქ. სამტრედია.
საინტერესოა, რომ ამ კუთხიდან გამოსული ცნობილი ქართველი პოეტის კ. კალაძის ლექსის რუს მთარგმნელს იანეთი განუმარტავს როგორც „იების ქვეყანა“. რამდენადაც ვიცით, თვითონ პოეტი კარლო კალაძეც იანეთს სიტყვა იას უკავშირებდა.
