ინდოეთის ოკეანე
ინდოეთის ოკეანე - სიდიდით მესამე ოკეანე დედამიწაზე (წყნარი და ატლანტის ოკეანეების შემდეგ). მდებარეობს აზიას (ჩრდილოეთით), აფრიკას (დასავლეთით), ავსტრალიასა (აღმოსავლეთით) და ანტარქტიდას (სამხრეთით) შორის.
ფართობი (კუნძულების გარეშე) 68,5 მლნ. კმ2. საშუალო სიღრმე 3700 მ, მაქსიმალური - 7729 მ. სანაპირო ხაზი ჩრდილოეთ ნაწილის გამოკლებით სუსტადაა დანაწევრებული. შელფი ფართო არ არის, აღწევს 100 კმ-მდე.
კუნძულები მადაგასკარი, შრი-ლანკა, სოკოტრა და სხვა კონტინენტური წარმოშობისაა; მასკარენის, კომორის, ანდამანის, სეიშელის და სხვა - ვულკანური წარმოშობისა; ლაკადივის, მალდივის, ჩაგოსის და სხვა - მარჯნის.
ინდოეთის ოკეანე იყოფა დასავლეთ (ნაკლებ ღრმა) და აღმოსავლეთ (ღრმა) ნაწილებად.
ოკეანის ჩრდილოეთ ნაწილში კლიმატი მუსონურია, სამხრეთ ნაწილის ტროპიკულ და სუბტროპიკულ განედებში გაბატონებულია პასატური ქარები, ზომიერ განედებში - დიდი სიმძლავრის ტროპიკული ციკლონები.
მნიშვნელოვანი ზედაპირული დინებებია: სამხრეთ-პასატური, მუსონური, მოზამბიკის, დასავლეთ ავსტრალიური.
შელფებზე არსებობს ნავთობისა და გაზის საბადოები (სპარსეთის და მანის ყურეები, რიფტურ ზონებში - ქრომის, მარგანეცის, რკინის მადანი და სხვა სტრატეგიული ნედლეული.
ინდოეთის ოკეანეზე მოდის მსოფლიო ტვირთბრუნვის 10%. ძირითადი საზღვაო გზები გადის ოკეანის ჩრდილოეთ ნაწილში.
ძირითადი საზღვაო პორტებია სპარსეთის ყურეში: რას-ტანურა (საუდის არაბეთი), ხარქი (ირანი), ბანდეო-აბასი (ირანი), მენა-ელ-აჰმადი (ქუვეითი) და სხვა.
