პაშალიდი ივანე

NPLG Wiki Dictionaries გვერდიდან
გადასვლა: ნავიგაცია, ძიება
პაშალიდი ივანე

პაშალიდი (ფაშალიდისი) ივანე (იონის) გეორგის ძე - (25.X.1885, ამასიის პროვ. ოსმალეთის იმპ.14.III.1968, თესალონიკი, საბერძნეთი) - სოციალ-დემოკრატი, საქართველოს დემოკრატიული რესპუბლიკის დამფუძნებელი კრების წევრი. საბერძნეთის სოციალისტური პარტიის დამფუძნებელი.

ბიოგრაფია

დაიბადა ბერძენი გლეხის ოჯახში, საშუალო განათლება მიიღო თბილისის რუსულ გიმნაზიაში. უმაღლესი განათლების მისაღებად ჯერ ოდესის უნივერსიტეტში სწავლობდა, საიდანაც სტუდენტური მოძრაობის წევრობისათვის გარიცხეს, ხოლო შემდეგ მოსკოვის უნივერსიტეტში მოიპოვა ექიმის დიპლომი. 1903 წლიდან რსდმპ-ს წევრი. ექიმად მუშაობა დაიწყო ქალაქ სოხუმში, აქტიურად მონაწილეობდა სოციალ-დემოკრატიული ორგანიზაციების საქმიანობაში. 1917 წლიდან შეუერთდა ქართულ სოციალ-დემოკრატიულ პარტიას.

1919 აირჩიეს საქართველოს დემოკრატიული რესპუბლიკის დამფუძნებელი კრების წევრად სოციალ-დემოკრატიული მუშათა პარტიის სიით. იყო აფხაზეთის ეროვნული საბჭოს წევრი. თანამშრომლობდა ქართულ და საქართველოში გამომავალ ბერძნულ გაზეთებთან.

1921 წავიდა ემიგრაციაში, ცხოვრობდა სტამბოლსა და ბერლინში, საბოლოოდ დასახლდა თესალონიკში და აქტიურად ჩაება საბერძნეთის პოლიტიკურ ცხოვრებაში, პარალელურად ეწეოდა სამედიცინო საქმიანობასაც. ემიგრაციაში არ წყვეტდა კავშირს ამიერკავკასიელ ემიგრანტებთან. 1931 წელს იოანის პაშალიდისმა, სხვა ბერძენ მემარცხენე პოლიტიკოსებთან ერთად, დააარსა „საბერძნეთის სოციალისტური პარტია“, 1951 წელს კი „მემარცხენე დემოკრატიული გაერთიანება“, რომლის თავმჯდომარეც იყო 1952-1964 წლებში, ამავე პერიოდში არაერთხელ გახდა საბერძნეთის პარლამენტის წევრი. 1967 წელს სამხედრო გადატრიალების შემდეგ, იყო შინაპატიმრობაში ქალაქ თესალონიკში, დაკრძალულია თესალონიკში.

ირაკლი ირემაძე

ლიტერატურა

  • ი. ხვადაგიანი, საქართველოს დამფუძნებელი კრება 1919, საბჭოთა წარსულის კვლევის ლაბორატორია, 2016;
  • სცსა, ფ. 1836, აღწ. 1, საქმე 108;
  • სცსა,ფ. 1834, აღწ. 2, საქ. 52.

წყარო

საქართველოს დემოკრატიული რესპუბლიკა (1918-1921) ენციკლოპედია-ლექსიკონი

პირადი ხელსაწყოები
სახელთა სივრცე

ვარიანტები
მოქმედებები
ნავიგაცია
ხელსაწყოები