შვეიცარია
შვეიცარია (Switzerland – შვეიცარიის კონფედერაცია) – სახელმწიფო ცენტრალურ ევროპაში, ალპებში. დასავლეთით ესაზღვრება საფრანგეთი, ჩრდილოეთით – გერმანია, აღმოსავლეთით – ავსტრია და ლიხტენშტაინი, სამხრეთით და სამხრეთ-აღმოსავლეთით – იტალია.
ფართობი – 41,3 ათ. კმ2.
მოსახლეობა – 7,9 მლნ. კაცი (2012).
ოფიციალური ენები – გერმანული, ფრანგული, იტალიური და რეტორომანული.
დედაქალაქი – ქ. ბერნი.
ადმინისტრაციულად იყოფა 23 კონტონად. ფედერაციული საპარლამენტო რესპუბლიკა.
სახელმწიფოს და პარლამენტის მეთაურია პრეზიდენტი.
საკანონმდებლო ორგანო – ფედერალური კრება (ორპალატიანი პარლამენტი), აღმასრულებელი – ფედერალური საბჭო (მთავრობა).
შვეიცარიის შექმნის თარიღად ითვლება 1291 წელი. XX საუკუნის ომებში შეინარჩუნა ნეიტრალიტეტი, რომელიც გამოაცხადა 1814–15 წლებში.
შვეიცარია განვითარებული ინდუსტრიული ქვეყანაა ინტენსიური სოფლის მეურნეობით. წარმოადგენს მსოფლიოს საფინანსო ცენტრს.
მრეწველობის წამყვანი დარგებია: მანქანათმშენებლობა, საათების წარმოება, ქიმიური, შავი და ფერადი მეტალურგია, ფარმაცევტული და კვების მრეწველობა. განვითარებულია საერთაშორისო ტურიზმი. სოფლის მეურნეობა აკმაყოფილებს ადგილობრივი მოთხოვნილების 60%-ს.
საერთაშორისო აეროპორტებია: ციურიხი, ჟენევა.
შეიარაღებული ძალები შედგება სახმელეთო ჯარების და სამხედრო-საჰაერო ძალებისგან – 25,6 ათ. კაცი (2012). სახმელეთო ძალების მობილიზების შემთხვევაში 197 ათ. კაცი, დაკომპლექტება ხორციელდება გაწვევის მილიციური სისტემით.
