შენს მოლოდინში

თ. ჯ - ძეს!

ჩემი გული უფრო გამალებით

ცემს შენს მოლოდინში!

ტერენტი გრანელი

მე შენზე ვფიქრობ და თითქო გხედავ,

ვფიქრობ და ისევ დღეა მზიანი.

ძვირფასო, მოსვლა რად გაგიძნელდა,

ძვირფასო, რისთვის დაიგვიანე.

ახლა ეს გრძნობა უფრო მეტია,

ახლა ქარები არხევენ ტირიფს.

მე შენ გიამბობ ჩემს ტრაგედიას

და, როგორც ბავშვი, დავიწყებ ტირილს.

ასე გაივლის წამება, ოხვრა,

შენ მოხვალ ჩემთან თეთრი ხელებით.

მოხვალ დაღლილი, მეტყვი: როგორ ხარ?

მოხვალ და ვიცი, მომეფერები.

თუმცა იქნება ღამე წვალების,

ღამე სასტიკი და ულმობელი.

და ეს თვალები, ლურჯი თვალები,

ჩემი თვალები ისევ მოგელის.

ლექსის ადრესატია თამარ ჯაფარიძე. ამის შესახებ მოთხრობილი აქვს მწერალ გენო ქელბაქიანს ტ. გრანელისადმი მიძღვნილ მოგონებაში ”ის მხოლოდ პოეზიით ცხოვრობდა” (ჟ. ”ცისკარი”, 1966 წ. № 11; 1967 წ. № 1).