დაკარსტულობის შეფასების მეთოდი

არსებობს ქანებისა და ტერიტორიის დაკარსტულობის მიახლოებითი შეფასების რამდენიმე მეთოდი: 1. შესასწავლ ტერიტორიაზე კარსტული ფორმების დათვლის მეთოდი. კარსტული ძაბრების, ტბების, მშრალი ღელეების და სხვა სახის კარსტული წარმონაქმნების რიცხვითი შეფარდება აღებული ფართობის ერთეულზე, რომელიც უნდა განხორციელდეს სხვადასხვა გეომორფოლოგიური ელემენტების, გეოლოგიური აგებულების ტექტონიკური სტრუქტურების გათვალისწინებით. ტერიტორიის დაკარსტულობა განისაზღვრება აგრეთვე კარსტების ფართობის ჯამური შეფარდებით დაკარსტული ქანების ფართობთან; 2. სიცარიელეების მოცულობის განსაზღვრის მეთოდი, რომელიც წყალშემცველი ჰორიზონტის დონის ბუნებრივი დაწევისა და შახტიდან წყალამოღვრისას გადმოდინებული წყლის რაოდენობის ტოლია. ეს მეთოდი გამოიყენება შესასწავლი წყლების ნაპრალიანობისა და დაკარსტულობის მხოლოდ ზედა ნაწილისათვის, რომლისთვისაც შესაძლოა მიწისქვეშა წყლების ბალანსის გამოთელა; 3. დაკარსტულობის განსაზღვრის რეგიონალურ მეთოდად გამოიყენება სეისმო და ელექტროძიების გეოფიზიკური მეთოდები; 4. ნაპრალიანობისა და დაკარსტულობის განსაზღვრა ხშირად ხდება ნაპრალებისა და სიცარიელეების გაზომვით გაშიშვლებაზე, კარიერებზე, სამთო გამონამუშევრების გვერდებზე, შლიფებზე, ბურღილის კერნებზე მათი ჯამური სიგრძის ან ნაპრალების ფართობის გამოთვლით (პროცენტებში), შეფარდებული სამთო გამონამუშევრებით გახსნილი ქანების ფართობთან ან მის მოცულობასთან; 5. გამოიყენება აგრეთვე საცდელი სამუშაოების შედეგები და დაკვირვებები მიწისქვეშა წყლების რეჟიმზე (ამოქაჩვა, ამოტუმბვა, ჩასხმა, დაჭირხნა და სხვ. 6. ქანის დაკარსტულობის მაჩვენებლად გამოიყენება ბურღილში გამრეცხი სითხის დაკარგვა და მისი რაოდენობა; 7. დაკარსტულობის მოცულობა შეიძლება განისაზღვროს მდინარის კალაპოტის ზოგიერთ უბანზე. მასში განვითარებული კარსტული პროცესების შედეგად დაკარგული წყლის რაოდენობით.