სამი გზა

ალექსანდრე ებანოიძეს

ძირულა. დიმი. აჭარა.

ფერი ლალის და გიშრის.

ეს არის სამი ფანჯარა,

სამი გზა ჩვენი ჯიშის.

გვივლია პარალელებად,

დღემდე გვივლია ასე;

როცა ამბავი გველევა,

წარმოსახვებით ვავსებთ:

მთის აჭარიდან მოიწევს

და გადმოიარს ჩოლოქს,

ის - ვინმე ებანოიძე,

დღესაც რომ ჩვენში ცხოვრობს.

მოდის დამკვრელი ებანის

და გულის ვარამს ამხელს,

და იხატება შეფარვით

მისი კეთილი სახე.

ჰოდა, სიკეთე რომ არის

გვარის რჯული და წესი, -

დასტურყოფ შენი რომანით,

მეც ვცდილობ - ჩემი ლექსით.

ძირულა. დიმი. აჭარა.

ფერი ლალის და გიშრის.

ეს არის სამი ფანჯარა,

სამი გზა ჩვენი ჯიშის.