"მწერლის გაზეთის" ე.წ. მიმომხილველმა შალვა ამინაშვილმა გაზეთ "ლიტერატურული საქართველოს" სერიული განხილვების დროს საქართველოს ლექტორთა კავშირის პატარა განცხადებაც მიკერძოებულად გააკრიტიკა და იმაზე მეტი დაწერა, რაც თავდაპირველ განცხადებაში ეწერა.

არამკითხე მიმომხილველი შალვა ამინაშვილი ცდილობს ვიღაცის წინაშე გააქიცინოს კუდი და მლიქვნელურად წერს:

"თქვე დალოცვილებო, ჩვენს დაბეჩავებულ ქვეყანაში სხვა ყველა პრობლემა მოგვარებულია და ეგღა დაგრჩათ მოსაგვარებელი, რომ ეროვნულ ბიბლიოთეკას ბატონი ლევანი არ უნდა ხელმძღვანელობდესო? საქმე გამოგელიათ?".

მართლა საქმეგამოლეული შალვა ამინაშვილი საკუთარი შეხედულების გამოხატვას პიროვნებასაც უკრძალავს და პარტიასაც, ლიტერატურის სფეროში დიქტატურის მომხრეა, თუმცა, ვინ ეკითხება ან დიქტატურას ან კრიტიკას.

ამ კარგ შალვას, როგორც თავის ვრცელ ოპუსებში ალაგ-ალაგ აღნიშნავს, გლეხური მეურნეობისათვის მოუკიდია ხელი. ჭკუაც უქნია. აბა, ლიტერატურის კრიტიკოსობა რა მისი საქმეა. იმასაც აღნიშნავს, რომ არ აქვს წყალი, შეშა, სინათლე. მრავალთა მსგავსად მასაც უჭირს.

თუკი ასეთ დღეშია, ამ კაი კაცს რა "ლიტერატურული საქართველოს" განხილვა-მიმოხილვა აუტყდა. უინტერესოდ იმეორებს ერთი და იმავეს და გამოქვეყნებული მასალების, თავისი აზრით, პოლიტიკური შეფერილობის კომპილაციას ახდენს.

როგორც ჩანს, კვლავ ვიღაცის წინაშე დამსახურებას ცდილობს, იქნებ რაიმე გამორჩენას გამოჰკრას ხელი.

ამ გზით აღებული ჰონორარით შალვა ვერ იცხოვრებს. ვერც ნავთს იყიდის, ვერც შეშას. ჯობია, ისევ მეურნეობას მიხედოს. მისი გაქანების კაცისგან აწი, ლიტერატურის მცოდნე, მით უმეტეს, მწერალი აღარ გამოვა.

თანაც გვინდა ვურჩიოთ, ძალიან ნუ იჩქარებს, წესიერად წაიკითხოს რაც არის დაბეჭდილი გაზეთსა თუ წიგნში, სიბოროტემ არ დააბრმავოს.

სწორედ ცუდი კითხვის შედეგია, რომ ხალხიც შეცდომაში შეჰყავს. აღნიშნავს, რეპლიკა თუ მცირე წერილი არის დაბეჭდილი "...მოქალაქეთა პოლიტიკური გაერთიანებისა და საქართველოს ლექტორთა კავშირის ხელმოწერითო".

მწერლობის მოძულეთა ბედზე, ღრმად ჩაფიქრებულმა შალვამ გრამატიკული კავშირი და სრულიად უმიზნოდ დასვა. ისე გამოიყვანა, თითქოს ორი ორგანიზაცია ებრძვის იმ უკან-უკან პროგრესირებულ ადამიანს, ვინც დიდ ილიასა და სულმნათ აკაკის ვერ იტანს.

აბა, დაკვირვებით წაიკითხოს შალვამ, როგორ წერია და იქნებ გაარკვიოს, რომ ეს ერთი და იგივე ორგანიზაციაა. ასევე ეცადოს, ამგვარი შეცდომა აღარ დაუშვას და თავი არ მოიჭრას.

მოქალაქეთა პოლიტიკური გაერთიანება საქართველოს ლექტორთა კავშირი.