13 დეკემბერს კოპენჰაგენში უდიდესი მოვლენა მოხდა - ევროკავშირმა ათ ახალ წევრს: პოლონეთს, უნგრეთს, ჩეხეთის რესპუბლიკას, სლოვაკეთს, სლოვენიას, ლიტვას, ლატვიას, ესტონეთს, კვიპროსსა და მალტას - უთხრა: "კეთილი იყოს თქვენი მობრძანება!"

დასრულდა მტანჯველი მოლაპარაკებებისა და სკეპტიციზმის ხუთწლიანი ეპოპეა; წარსულს ჩაბარდა ევროფილებისა და ევროსკეპტიკოსების ცხარე დებატები: რა არის ევროპა - გეოგრაფიული ფენომენი თუ საერთო ღირებულებებით გაერთიანებული პოლიტიკური და ეკონომიკური სივრცე? რას მოუტანს ევროპის ეკონომიკას საშუალოდ და სუსტად განვითარებული ეკონომიკების ტვირთად აკიდება? გეოგრაფიული კუთვნილების მიხედვით, ვისია ლუდი "ბუდვაიზერი" - ჩეხეთის თუ გერმანიის? და რაკი გერმანია ვახსენეთ, შეუძლია თუ არა მარკიდან ევროზე გარდამავალ პერიოდში მყოფ გერმანიას, როგორც ყველაზე მსხვილ გადამხდელს, 800 ათასი პოლონელი გლეხის მეურნეობის პატრონობა?..

სხვათა შორის, ამ საკითხებს აქტუალობა არც გადაწყვეტილების მიღების შემდეგ დაუკარგავთ და მათზე მსჯელობა კიდევ არაერთ მტანჯველ ხუთწლედს წაიღებს. 13 დეკემბერს კოპენჰაგენშიც, სადაც ევროკავშირი 10 წევრით გამდიდრდა, და თბილისშიც, სადაც ევროკავშირის ელჩმა საქართველოში საგანგებო დარბაზობა გამართა, უფრო რაოდენობრივ პარამეტრებზე ამახვილებდნენ ყურადღებას, ვიდრე თვისობრივზე, სახელდობრ: ევროკავშირის გეოგრაფიული საზღვრების გრძივებსა და განედებზე, ერთბაშად 90 მილიონით გაზრდილ პოპულაციაზე... თუმცა ორივე ღონისძიება არც დეკლარაციული ხასიათის განცხადებების სიმწირეს უჩიოდა. "ეს უდიდესი მოვლენაა, - აღნიშნა კოპენჰაგენში პოლონეთის ელჩმა ევროკავშირში, მარეკ გრელამ, - იგი აღნიშნავს გასული საუკუნის ორი სამარცხვინო მოვლენის საბოლოოდ დასამარებას: ტოტალიტარული ერისა და ევროპის გაყოფის". თბილისში კი ბატონმა ელჩმა განაცხადა: ეს ნიშნავს შრომისა და კაპიტალის თავისუფალ მოძრაობას და საერთო გარემოსდაცვითი წესრიგის დამყარებას ევროპაში.

კოპენჰაგენის სამიტის შემდეგ ევროპელი და მსოფლიო პოლიტოლოგების ყურადღების ცენტრში ორი საკითხი აღმოჩნდა: ეკუთვნის თუ არა თურქეთი ღირებულებრივ ევროპას და როგორ იმუშავებს ევროკავშირის ძველი ძრავი - საფრანგეთ-გერმანიის დუეტი - 25 რთული დეტალისაგან შემდგარ ახალ ევროპულ მანქანაში...