18 დეკემბერს საქართველოს ოფიციალური ვიზიტით ესტუმრა უკრაინის სამთავრობო დელეგაცია უკრაინის პრეზიდენტის, ლეონიდ კუჩმას, ხელმძღვანელობით. დელეგაციას თბილისის აეროპორტში საქართველოს პრეზიდენტი და მთავრობის სხვა წევრები დახვდნენ. აეროპორტში პრეზიდენტების ხანმოკლე თათბირის შემდეგ ორივე მხარის დელეგაცია კრწანისის რეზიდენციაში გაემგზავრა. უკრაინისა და საქართველოს პირველი პირები პირისპირ, დახურულ კარს მიღმა, დაახლოებით ორი საათის განმავლობაში საუბრობდნენ. შეხვედრის დასრულების შემდეგ კი საზეიმო ვითარებაში ხელი მოაწერეს სოფლის მეურნეობის სფეროში მიღწეულ ორ შეთანხმებას. კერძოდ: პირველი - შეთანხმებას სოფლის მეურნეობის სამინისტროსა და უკრაინის აგრარული პოლიტიკის სამინისტროს შორის მცენარეთა კარანტინის სფეროში ურთიერთთანამშრომლობის შესახებ. მეორე - შეთანხმებას სოფლის მეურნეობის სამინისტროსა და უკრაინის სახელმწიფო მატერიალური რეზერვების სახელმწიფო კომიტეტს შორის აგროსამრეწველო კომპლექსის სფეროში ეკონომიკური თანამშრომლობის შესახებ.

შეთანხმებას უკრაინის მხრიდან ხელი მოაწერა უკრაინის აგრარული პოლიტიკის მინისტრმა, სერგეი რიჟუკმა; საქართველოს მხრიდან კი - სოფლის მეურენობის და სურსათის მინისტრმა, დავით კირვალიძემ.

როგორც სოფლის მეურნეობისა და სურსათის მინისტრმა, დავით კირვალიძემ, ჩვენთან საუბარში განაცხადა, ხელშეკრულების პროექტი, დაახლოებით, ერთი წლის მანძილზე მზადდებოდა.

ხელშეკრულებაზე ხელის მოწერის შემდეგ პრეზიდენტებმა ჟურნალისტებისთვის ბრიფინგი გამართეს, რომლის დროსაც ყურადღება გაამახვილეს ორივე ქვეყნის ნატოში გაწევრიანების პერსპექტივაზე. პრეზიდენტმა კუჩმამ განაცხადა, რომ უკრაინა უკან არ დაიხევს და ყველა ღონეს იხმარს ნატოში გასაწევრიანებლად.

პრეზიდენტებმა აღნიშნეს, რომ უკრაინა მონაწილეობას მიიღებს აფხაზეთის პრობლემის მოგვარების საქმეში.

მომავალ წელს კი საქართველოში გაიმართება უკრაინის კულტურის დღეები. როგორც პრეზიდენტმა კუჩმამ განაცხადა, კულტურის დღეები არ შემოიფარგლება მხოლოდ კონცერტებით, არამედ იგი უფრო ღრმა შინაარსის იქნება.

საქართველოს მთავრობის წევრებმა საქართველოში უკრაინის დელეგაციის ვიზიტს მაღალი შეაფასება მისცეს.

უკრაინის დელეგაცია საქართველოდან 19 დეკემბერს გაემგზავრა.