"ინტერფაქსის" ცნობით, 10 დეკემბერს რუსეთის ფედერაციის საბჭომ მანდატი 2002 წლის 31 დეკემბრამდე გაუგრძელა რუს მშვიდობისმყოფელებს, რომლებიც ქართულ-აფხაზური კონფლიქტის ზონაში იმყოფებიან.

რუსმა სენატორებმა შეშფოთება გამოთქვეს იმის გამო, რომ რუსი მშვიდობისმყოფელების სტატუსი ჯერ კიდევ არ არის განსაზღვრული. უშიშროებისა და თავდაცვის კომიტეტის თავმჯდომარემ, ვიქტორ ოზეროვმა, აღნიშნა, რომ რუსი სამხედრო მოსამსახურეები კონფლიქტის ზონაში იქამდე დარჩებიან, სანამ ქართული მხარე მათი გაყვანის შესახებ გადაწყვეტილებას არ მიიღებს. ოზეროვმა იმედი გამოთქვა, რომ საქართველო-რუსეთს შორის თანამშრომლობის ხელშეკრულების ამოქმედება ხელს შეუწყობს ქართულ-აფხაზური კონფლიქტის მოგვარებას.

პრეზიდენტ პუტინის წარმომადგენელმა ქართულ-აფხაზური კონფლიქტის მოგვარების საქმეში, ვალერი ლოშინინმა აღნიშნა: "მშვიდობისმყოფელთა ე. წ. კოლექტიურ ნაწილებში სინამდვილეში მხოლოდ რუსი სამხედროები იმყოფებიან. ქართულ-აფხაზური კონფლიქტის მოწესრიგების საქმე კი ძალიან ნელა მიიწევს წინ, რაც ქართულ და აფხაზურ მხარეებს შორის უნდობლობით არის გამოწვეული. მდგომარეობას ართულებს ისიც, რომ აფხაზურ მხარეს არ სურს, მოიაზრებოდეს საქართველოს ნაწილად". ლოშინინმა გაიზიარა რუსი სენატორების შეშფოთება იმასთან დაკავშირებით, რომ ქართული მხარე აფერხებს რუსი მშვიდობისმყოფელების სტატუსის განსაზღვრას. "ჯერჯერობით არაფერია ცნობილი იმის შესახებ, როგორი იქნება ჩვენი მშვიდობისმყოფელების მანდატი მომავალ წელს", - აღნიშნა ლოშინინმა.

2002 წლის 31 დეკემბრის შემდეგ რუსი მშვიდობისმყოფელების მომავალი ბედის შესახებ გადაწყვეტილებას მიიღებენ ???-ს ქვეყნების პირველი პირები.