ტყვეთა გაცვლისა და უგზო-უკვლოდ დაკარგულთა მოძიების ქართულ-აფხაზური საკოორდინაციო კომისიების მოლაპარაკებები სამი ქართველი პატიმრის - ჩოლოგუას, ჩხეტიანისა და მამასახლისის გათავისუფლების შესახებ, ფაქტობრივად, ჩიხში მოექცა. სეპარატისტებმა ყველა შეთავაზებულ ვარიანტზე სასტიკი უარი განაცხადეს იმ მოტივით, რომ პატიმრებს მხოლოდ პატიმრებში გაცვლიდნენ. ქართულ მხარეს კი გასაცვლელი აფხაზი პატიმრები არ ჰყავს.

ჯოლოგუა, მამასახლისი და ჩხეტიანი სეპარატისტებმა შარშან კოდორის ხეობაში განვითარებული ცნობილი მოვლენების დროს აიყვანეს მძევლად. წელიწადზე მეტი ხნის პატიმრობის შემდეგ აფხაზებმა ჯოლოგუას სამუდამო, ხოლო მამასახლისსა და ჩხეტიანს 12-13 წლით პატიმრობა შეუფარდეს. მათ გათავისუფლებასთან დაკავშირებით მოლაპარაკებები დროებით შეწყდა. ისინი სოხუმის ყველაზე დიდი სისასტიკით ცნობილ ე. წ. გრანდის ციხეში იმყოფებიან. მათ ნახვას ოჯახის წევრები წითელი ჯვრის საერთაშორისო ორგანიზაციების დახმარებით დროდადრო ახერხებენ.

პატიმრების ჯანმრთელობის მდგომარეობა ნორმალურია. სეპარატისტები მათ წერილის დაწერის უფლებას მხოლოდ იმ შემთხვევაში აძლევენ, თუ წერილში არაფერი იქნება ნათქვამი პოლიტიკაზე.

ტყვეთა გაცვლისა და უგზო-უკვლოდ დაკარგვის მოძიების ქართულ-აფხაზური საკოორდინაციო კომისიები 10 იანვრიდან გააგრძელებენ მოლაპარაკებებს ბაბუშერიდან 33 ქართველი მეომრის ცხედრის გადმოსვენებასთან დაკავშირებით.